COVID-19 dona a Mizoram sawrkar tha tih chak nana hmala tura ngenna Larsap hnenah thlen

Mizoram Legislative Assembly-a Congress Legislature Party Leader, Zodintluanga Ralte chuan nimin khan Mizoram Governor, P.S. Sreedharan Pillai hnenah COVID-19 chungchanga Mizoram sawrkar kut tih chak nana hmala tura ngenna ziakin a thlen a. He lehkha hi Governor aiawhin Secretary to Governor, K. Lalthawmmawia IAS chuan a lo dawng a ni.

Governor hnena ngenna a thlen ah hian Zodintluanga chuan Mizoram sawrkarin COVID-19 dona kal meka harsatna tawk mipuite a chhawmdawl dan chungchangah, a bikin Mizoram pawna kan mi leh sa tangkhangte chhawmdawlna chungchangahte duhkhawp lohna engemawzat an nei tih tarlangin, April 8, 2020 khan MPCC President chuan Mizoram Chief Minister hnenah India ram hmun hrang hranga Mizo tangkhang mekte chhawmdawlna pe tura ngenna ziaka alo thlen tawh thu leh Data lakkhawma an awmna State sawrkara tanpui tura ngenna lehkha siam (DO Letter siam) bak tun thlengin hmalakna a la awm lo niin a tarlang a. Tunah hian India ram hmun hrang hrangah Mizo zirlaite, hnathawka awmte, zin vei vak leh dam lo engemawzat an tangkhang mek tih sawiin, April 16, 2020 thleng khan hetianga tangkhang hi mi 2576 chhinchhiah an nih tawh thu leh chhinchhiah loh engemawzat awm turah ngaih a ni bawk tih tarlangin, “Heng zingah hian pawisa nei tawh lo, ei tur pawh nei mumal tawh lo engemawzat an awm mek a, chhawmdawlna pek hi thil hmanhmawh thlak tak a ni,” a ti a. State thenkhat (Manipur, Meghalaya, Sikkim leh Arunachal Pradesh) ten State dang-a an mi leh sa tangkhang te hnenah tanpuina pawisafai an pek tawh dan a tarlang bawk.

Mizoram sawrkar chuan COVID-19 dona atan pawisa a nei thlawt lo nia a lan thu pawh tarlangin Zodintluanga chuan, “Chief Minister, Minister leh MLA-ten anmahni mimal sum sengin an bial chhunga tanpui ngaite nasa takin an tanpui tawh a ni. Supply Minister phei chuan Bairabi Rel Station-a sawrkar buhfai unload-na man Rs. 1,53,398/- zet ama mimal pawisa a hmang tawh niin Media-ah report a ni,” tiin heng bakah hian Kohhran leh mi tlawmngaiten chhungkaw sang tam tak tanpui tawhin, COVID-19 dona kawnga frontline a awm, Local/Village Level Task Force-ten sawrkar pawisa ni lo, mi thahnemngaite thawhkhawm hmangin chhawmdawlna an kalpui thu pawh a tarlang a, “Local/Village Level Task Force thenkhat phei chuan CM Relief Fund-ah pawisa an chhunglut zawk hial a ni,” a ti a. Mizoram sawrkar chuan sawrkar laipuiin chhawmdawlna a siam - Construction Workers Welfare Board pawisa atanga tanpuina a sem bak chu state sawrkar pawisa atangin chhawmdawlna hi a la kalpui miah lo nia a lan thu a tarlang a. Hei vang hian sawrkar laipui atanga tanpuina awm thei ang ang Mizoram tan dapsak mai tura a ngen bakah Lockdown avanga harsatna tawk mek mipuite chhawmdawlna tur pawisa hi Mizoram Budget atang ngeia thehchhuah a nih theih nana hma lak sak turin a ngen bawk.