Serchhip District Bawrhsap in Myanmar nena inrina laia ramri venhimna thawh dan a enfiah

Serchhip District leh Myanmar inrina area-a awm, Lungkawlh leh Sailulak khua te chu nimin khan Serchhip District Bawrhsap leh Serchhip District Task Force Committee on COVID-19 Chairman, Dr. Lalzirmawia Chhangte chuan tlawhin Village Level Task Force (VLTF) te hmalak dan a enpui.
Serchhip District Bawrhsap hian nimin-a Lungkawlh leh Sailulak khua te a tlawhna ah hian heng khaw pahnih-a Village Level Task Force ten Serchhip District chhung Myanmar ramri Tiau lui kai-a an duty dan leh hmalak dan te a hmun ah kalin a enfiah a, Duty te ei leh in tur leh Silpauline bakah a tul a hman turin Hand Sanitizer leh Mask te a pe a. Village Level Task Force hruaitute nen inkawmhona an neih ah Serchhip District Bawrhsap chuan COVID-19 hri leng mek dona kawngah Serchhip District chhung leh a bik in Myanmar ramri-a a taka thawktute inpekna chu Mizo mipuiin kan hre reng tih sawiin, “Kan ram himna in ni,” a ti a, ruahman dan in May ni 3-ah mipui inkharkhipna a lo tawp a nih pawh in ramri-a duty chu kalpui reng a tul thu sawiin, theihtawp chhuah zel turin a fuih bawk.
Nimin-a heng khaw pahnih a tlawhna ah hian District Bawrhsap hi VCP leh Village Level task Force hruaitu ten an lo dawngsawng a, hetianga District Bawrhsap in ramri-a an duty na a hmun ngei a tlawh chu lawmawm an tih thu sawiin, Zoram him nan theihtawp chhuah an tum thu leh mi thahnem ngai thilpek pe thintu te chung ah an lawm hle tih an lo sawi bawk a ni.
Serchhip District Bawrhsap in nimin-a heng khaw pahnih a tlawhna ah hian Bawrhsap hi Serchhip SP, R. Sathiyasundaram IPS leh North Vanlaiphai SDO (C), Dorothy Muansangi bakah East Lungdar BDO, H. Lalhruaitluanga leh Serchhip DC Office atangin SDC, Samuel Zodinsanga te bakah MJA hruaitu ten an tawiawm a, Tuichangral-a Village Level Task Force thenkhat te Duty-na pawh an tlawh nghal bawk a ni.

Comments

Chhiar Hlawhte