Home Minister chu ram hruai hna thawk tlaklo ah ngai

Mizoram Pradesh Congress Committee (MP-CC) chuan Home Minister, Lalchamliana chu hun khirh laia ram hruai hna thawk tlak lo ah an ngaih thu an sawi.

Nimin a thuchhuah an siamah MPCC chuan April 18, 2020-a Tripura ramri a Village Level Task Force-te nena duty 5th IR Batallion mi pahnih ten Tripura Chakma mite kut an tuar chu pawi an tih thu sawiin, he thil thleng hian COVID-19 dona kawnga Mizoram sawrkar ruahmanna fel tawk loh zia a tarlang chiang hle ah an ngaih thu leh Home Minister chuan mawh a phur lian hle ah an ngaih thu an tarlang a.

Mizoram sawrkarin COVID-19 laka inven nana Lockdown a kalpui danah Police leh Magistrate-ten Law & Order kengkawh lova Local/Village Level Task Force a rin zawk avangin Mizoram Police-te hlutna nasa takin a tlahniam nia tarlangin, L/VLTF-te kianga duty Police-ten tih tur an nei mumal lo a, hei vang hian Mizoram Police-ten zah an hlawh tawk lova, kut hial an tawrh phah ta ah an ngai tih an tarlang a. He thil thleng avanga West Phaileng Police Station-a FIR thehluh a nih laia Tripura Police-ten pawikhawihtu nia hriatte an man leh, Kanchanpur Chief Judicial Magistrate-in bail-a a lo chhuah daih mai chu pawi an tih thu pawh tarlangin, pawikhawihtute hi an pawikhawihna, Mizoram chhung ngeia an chungthu ngaihtuah a nih theih nana chak taka hma la turin Home Minister chu an phut thu leh Police kut-thlaktute hi mi engemaw zat nia sawi an nih avangin midang te pawh man an nih thuai theih nana hma la tura an phut thu an sawi bawk.

MPCC chuan Home Minister, Lalcham-liana chu Disaster Management & Rehabilitation Minister a nih angin COVID-19 dona ah hian a phusa berte zing a mi a ni turah an ngaih thu pawh tarlangin, amaherawh chu DM&R Minister a ni tih pawh hriat mang loh khawpa a awm thei chu mak an tih thu leh hun khirh laia ram hruai hna thawk tlak lovah an ngaih thu an tarlang bawk.