RD Minister in Kolasib District chhung a tlawh

Rural Development Minister, Lalruatkima chuan nimin khan Kolasib District-a Thingthelh, Bukpui, North Hlimen, Saipum, Saiphai, Phainuam leh Saihapui ‘V’-a Village Level Task Force te chu an Duty-na hmunah a tlawh.

Heng Duty na hmun a tlawhna ah hian RD Minister chuan COVID-19 hripuiin min nuai mek tih sawiin, he hripui kan dona atan a lungthu pathum - Sawrkar, Kohhran leh tlawmngai pawl kan neih te chu an hlu takzet tih a sawi a. “He kan lungthu pathum te avang hian he hripui lakah hian kan him a, he hun harsa hi an zarah harsatna lian lutuk tawk lovin kan paltlang ngeiin ka ring,” a ti a. Mipuiin sawrkar thu an zawm tha chu lawmawm a tih thu sawiin, “Kan tanrualna rah liau liau avangin he hripui hi kan hneh ngei ang tih ka ring a ni,” a ti a. He hri dona kawnga Chief Minister, Zoram-thanga hmalakna chu ropui a tih thu pawh sawiin, Chief Minister ruahmanna felfai tak avangin Minister leh MLA te a tul apiang ah khaihlak awm lovin an thawh chhuah thin thu a sawi bawk.

He hun harsa kan tawh mek lai hian tumah chhuanchham a an awm an phal loh thu leh chhuan-chham-a awm an lo awm palh ang tih an hlau hle tih sawiin RD Minister chuan, hemi kawng ah hian Sawrkarin theihtawp an chhuah thu a sawi a, “He hun harsa kan tawh mek hi malsawmna ah chantir ang u. Buhbal leh thlai ching uar lehzual ila, intodelhna atan rahbi pawimawh ah he hun hi i hmang ang u,” a ti bawk.

Nimin a heng VLTF Duty-na hmun a tlawh te hnenah hian Minister hian Rs. 5000/- theuh pein Minister tawiawmtu Serlui bialtu MLA, Lalrinsanga Ralte pawhin VLFT zinga riak lut a duty te hman tur Solar Lamp 30 leh Silpaulin bakah pawisa fai engemawzat a pe vek bawk a. He hripui leng laka Mizoram himna atan Serlui bial chu an pawimawh takzet tih sawiin, chumi atana ramri vengtute inpekna chu ropui a tih thu a sawi a, an chungah lawmthu a sawi bawk.