Aizawl Bawrhsap Pisa Pui kum 130 tlinna pualin Document pawimawh phochhuah a ni

Aizawl Bawrhsap Pisa Pui-in kum 130 a tlin hriatrengna chu nimin khan COVID-19 leng mek karah mi tlemte sawmin neih a ni a, mipuite hmuh theih turin hmanlai-a hmanrua, ruhro, document hrang hrang leh record hlui tak tak Pisa Pui-a la vawn thatte phochhuah a ni.
Vailen vawikhatna a liam hnuah Lusei (Mizo) lal ten an chhehvela khawsa hnamdang, British awpna hnuaia mite an run leh ta fo a. Sal-ah te an man thin a, hei vang hian Lushai Hills chu British in awpbeh tak tak a tulin a hria a. Lushai Hills Expedition 1889 - 1890 (vailen vawihnihna) chu duangin, kum 1890-ah Govt. of Assam hnuaiah North Lushai Hills a piang ta a. Headquarters atan Aijal (Aizawl) thlan a ni a. North Lushai Hills a Bawrhsap hmasa ber (Political Officer) atan Captain HR. Browne IA, Lusei-te chanchin thui tak lo hre sa tawh chu British Sawrkarin a ruat a. Incumbency chart-a a lan danin a hna hi April 22, 1890-ah a zawm a, September ni 9, 1890 thlengin he hna hi a chelh a. Aizawl Bawrhsap Pisa Pui-ah hian Bawrhsap - Political Officer 7, Superintendent 32 leh Deputy Commissioner 45; a vaiin Bawrhsap 84 an awm tawh a. A kum 130-na a Bawrhsap ni mek chu Vanlalngaihsaka IAS a ni.
Aizawl Pisa Pui Bawrhsap hmasa ber, HR. Browne hian Mizo lalte chu kum 1890 khan remna (Sa Ui tan) a neihpui a, hemi hnu lawk hian Mizo lal thenkhat ten bei thutin September 10, 1890 a Shillong a kal tur chu Sairang thlang lawk, Changsil thlen hma KM 2 velah lo lambunin amah vengtu sipai pathum an kaphlum a. Captain Browne hi Sakawr-in Changsil kulh a tlanlut hram na-in a taksa hmun thum a silai hliamna tuar zo lovin Changsil kulh chhungah a boral zui a, Changsila sipai hotu, Lt. Loch-a’n a dawm hlum a ni.
Aizawl Pisa Pui hi North Lushai Hills Area-a Office hmasa ber a nih avangin Mizo chanchin (history) nen thuk takin a inkungkaih a. Office building hi State Heritage Building-ah puan a ni tawh a. Sap ho sulhnu mai bakah hmanlai Mizo lalte chanchin, chhiarpui, Electoral Roll, leh Record hlu dang tam tak dahthatna hmun a ni. Record pawimawh thenkhat hi Mizoram State Archive Office lamah dah ni tawh mah se, record hlu tak tak engemaw zat Pisa Pui-ah hian vawnthat a ni a. Mizo history zirchiangtute tan pan manhla tak niin tuna document pawimawh an phochhuah hi tunkar chhung phochhuah a ni dawn a ni.

Comments

Chhiar Hlawhte