Serchhip Police ten kawl

Myanmar atanga Mizoram-a lo lut Vietnam mi rualbanlo pakhat E. Lungdar Village Level Task Force ten an mikhual chu nizan hmasa khan Serchhip Police ten la-in an kawl mek.

He Vietnam pa hi Mizoram sawrkarin Ministry of External Affairs ah thil awmdan a hrilh ang a, MEA hian Vietnam Embassy-ah an lo buaipui zui dawn niin sawrkar thuneitute chuan an sawi a. CO-VID-19 chungchangah a hranpa a khunghran a ngaih an rin tawh loh thu an sawi.

Thudawn danin 'Niang' ni a insawi hi Vietnam rama Can Tho khuaa cheng niin sawi a ni a. March ni 28 khan Champhai District-a Thekte khuaah luh a tum a, Thekte VLTF duty ten luh an lo phalsak lova. Hemi hnu hian Tiau dung zawh thlain, March ni 30 chawhnu lam khan Khuang-thing VLTF duty ten an lo hmu a, eitur leh inthlakna tur thawmhnaw te pein ramri thlengin an thlah leh a. April ni 1 khan E. Lungdar khuaah a chuang chhuak a, VLTF ten buaipuiin ni 14 an khung-hrang phawt a, chumi hnu-ah Serchhip District Police kutah hlan a ni ta a ni.

East Lungdar-a a awm tirh hian tawng an inhriattawn loh avangin a chanchin an hre thei lawk lova, khawchhak lam mi hmelpu a nih angin khawchhak lam tawng thiam hrang hrangte hmangin biak an han tum a, a hre lo zel a, a tawpah Vietnam a Mizo Tirhkoh awmte chuan Vietnamese tawngin an be tawng thei ta a, a hming chu Niang niin, Vietnam ram Can Tho khuaa awm a ni tih hriat a ni ta a ni. Amah hi a ban veilam a bul a, rilru lamah pawh mi pangngai phak zan lo ni a hriat a ni.

He Vietnamese hi dan lova lo lut a nih avangin a nihna takah chuan man a thubuai siam sak tur a ni a, mahse amah hi pianphunga rualbanlo leh rilru lamah pawh mi pangngai phak zan loa ngaih a nih avangin, Serchhip Police Station a miten an thiam dan danin an lo kawl dawn a ni.