High Court in Dinthar Veng thil thleng a ngaihtuah

Tun thla ni 25 zan-a Aizawl Dinthar Veng-a Task Force Duty ten mi thenkhat kut an thlak nia sawi chungchang chu nimin khan Gauhati High Court, Aizawl Bench chuan ngaihtuahin, he thil thleng ah hian Danpui bawhchhiatna a awm niin a sawi.

Nimin a he thubuai a ngaihtuahna ah hian Gauhati High Court, Aizawl Bench chuan Aizawl District Bawrhsap leh Aizawl Superintendent of Police-te chu chawlhkar hnih (2) chhunga thil thlen dan tarlanna 'status report' thehlut tura hriattirin, “Dinthar Local Level Task Force (LLTF) member-te laka thubuai ziahluh kher tur tihna erawh a ni lo,” a ti a. Chanchin thar leh chanchinbu-a thuchhuahte thlirin Aizawl Dinthar-a thalai pariat, Ganja zu-a puhte kutthlak an nih chungchangah hian ram danpuiin 'Tu nunna leh zalenna mah Dan hnuaiah lo chuan chhuhsak theih a ni lovang,' a tih bawhchhiat nia a lan thu a sawi a. “Ganja nena man an nih chuan thalaite hi Police emaw, Excise emaw hnenah hlan tur an ni a. Curfew/lockdown an bawhchhia a nih chuan Police hnenah hlan tur an ni thung,” a ti a. “Thalai pariat te dan bawhchhiatna chu dan bawhchhiatna thovin thungrulh tur a ni lova, thil diklo pahnih belhkhawmin thil dik a hring lo,” a ti bawk.

Court chuan Local Level leh Village Level Task Force-te'n Co-ronavirus darh tur ven kawngah an thawk tha hle niin hriat mah se, he an hnathawh tha te hi mahnia thuneihna inpek tumte avangin a hmingchhiat a hlauhawm thu pawh sawiin, State sawrkar pawhin LLTF/VLTF te thuneihna mumal tak a duan a tul thun a sawi a, Task Force-te hi a khuahkhirh loh chuan hun reilote-ah Coronavirus leng tur dan tumna ah hrilhhaina, rorelna mumal lo, harsatna leh dan bawhchhiatna a thlen a hlauhawm tiin, State sawrkar pawh LLTF/VLTF-te thuneihna tichiang turin a hriattir nghal bawk.