Chanchin thar thenkhat :

Police hmalakna thlirlet

Mizoram Police te chuan a tum 4-na atan nimin khan COVID-19 avanga Lockdown kalpui chhunga an hmalak dan thlirletna chu Aizawl SP Conference Hall-ah an nei a. He hunah hian IGP (Law and Order), L.H. Shanliana chuan ramri hrula Police 700 vel leh Village Level Task Force mi 2,000 aia tlem lo duty te avangin tun thlengin Mizoram a la him niin a sawi a. IGP (L&O) LH. Shanliana chuan tun dinhmunah khawchhak leh khawthlang ramri hrul hmun 135-ah Police 700 vel venhimna hna thawka an duty reng thu sawiin, Village Level Task Force-te hi hmun 198 ah mi 2000 aia tlem lo nitin an duty bawk tih a sawi a. Contact tracing hi DIG (Northern Range) kaihhruaina hnuaiah Police Officer 15 leh Police mi leh sa dang engemawzatin thawkin, Law and Order bikah Point 182-ah mi 1776 an duty a. Police Station hna kal lai pangngai leh Police duty dang hrang hrang te chawl lova a kal reng thu a sawi bawk.

Hri dona a hmalakna tha ti

COVID-19 Medical Operational Team Chairman, Dr. ZR Thiamsanga, MLA chuan District hrang hrangte hri leng dona kawnga an hmalak dan a hmuna an enfiah tawh chinah a lungawi-thlak hle tih a sawi a. Saitual, Khawzawl leh Cham-phai District chhunga an hmalak tawh dan te an enfiah tawh chinah lungawithlak leh fakawm a tih thu Dr. ZR. Thiamsanga chuan sawiin, Cham-phai District chu ramri thui tak nei a nih avangin venhim pawh a hautak hle a, sawrkar in a tul ang zela puih a thum thu leh ramri hnaih a awm te chu theihtawp chhuah zel turin a chah bawk. Dr. ZR. Thiamsanga chuan Mizoram sawrkar rua-hmanna in COVID-19 Medical Operational Team pali (4) din a nih thu sawiin, an tum ber chu Mizo-ram puma COVID-19 dina kawnga hmalakna zirchian te, mipuite hnena zirtirna pek leh damlo awm thulh pawha enkawla, sawngbawl thlenga ruahmanna felfai tak siam te a ni a, an zirchianna te chu sawrkar-ah an thlen leh dawn tih a sawi bawk.

Bungtlang South-ah In kang

Nimin zing dar 1:00 leh 2:00 inkar vel khan Lawngtlai District chhim lam, Bungtlang South khua a Liannguri In chu a kang a, bungrua engmah chuh hman a ni lo. He In hi Assam Type niin chhawng hnih a ni a, chhungkaw pahnih ten luahin kangmei chhuah chhan tak hi hriat a ni lo a, bungrua cheng nuai 5 hu vel a kang nia hriat a ni.

Damlo 3 chhuahtir an ni

Zoram Medical College (ZMC)-a damlo pathum (3) te chu COVID-19 Test neih an nih hnuah an result a negative avangin nimin khan chhuahtir an ni a, nimin khan damlo admit thar awm lovin tunah hian rinhlelh damlo pakhat a awm mek a, Vawiin hian a Sample test neih tura ruahman a ni bawk.