Lockdown inkaihhruaina tih danglam leh hlek a ni

Sawrkarin inkharkhip chhunga inkaihhruaina a siam tharah Lo lama feh leh ramhnuai a chaw-hmeh zawn bakah chawhmeh tur sawngbawlte khuahkhirhna a hlip.

State Disaster Management Authority-a State Executive Committee Chairman, Lalnunmawia Chuaungo chuan  April ni 16-a inkharkhip chhunga Mizoram chhunga hman tur inkaihhruaina a tihchhuah engemawzat a tidanglam a. Heng zingah hian thingtlang lam khaw mite feh leh ramhnuai-a chawhmeh zawn leh tuah thing (Minor Forest Produce) fawm/zawn leh sawngbawl bakah mau/rua, kuhva rah, Hmarcha, Sawhthing leh Bawlhhlo (spices) lama hmalakna hrang hrang- phun/chin, thar-chhuah, seng, sawngbawl leh hralhte chu khuahkhirh zinga telh a ni ta lo a ni.

Inkaihhruaina tharah hian Prepaid Mobile recharge na hmun te chu inkharkhipa khar turin a huam tawh lovang a, Tui pek/sem, faina kawnga hmalakna/Sanitation hna, Electric ban leh hrui thar bun/thlun leh Telecom Optical Fiber line phum te pawh khuahkhirh loh tur zingah belh a ni. Nitin mamawh ni lo, ei leh bar zawnna leh hmasawnna atana mamawh bungrua - steel, cement, brick, balu, insakna bungrua ilo la lut tur te phur tur chuan dilna form siam hmangin Home Department phalna lak hmasak tur niin Mizoram chhunga bungrua awmsa hmundanga phurh sawn dawnin a bungraw phur turte awmna hmun District Bawrhsapte hnenah phalna lak tur a ni ang.