Chanchin thar thenkhat :

Flex Board leh Poly Vinyl Chloride poster hman khap

Plastic Pollution tih tlem nan sawrkar Office leh Institution zawng zawngte chu an Function/Programme-ah Plastic Waste Management Rules, 2016 tlawhchhanin Flex board leh Poly Vinyl Chloride poster te hmang tawhlo tura hriattir an ni a. Poly Vinyl Chloride (PVC) hi tawih theilo niin, halin mihring tana chemicals hlauhawm- Dioxins, Furans leh adangte a p chhuak a, mihring tan mai nilo, kan chenna khawvel Eco-System Food-Chain tibuai theitu a ni. Plastic Pollution hi India ram pumah a lo tlem zawk nan vawikhat hman plastic (single use plastic) te hi hmang tawhlo turin sawrkar laipui chuan a phut a. PVC hmanglo a tawih thei (biodegradable) puan emaw, Natural Fibre-Based Board te hmang tura thurawn pek an ni bawk.

MSSB in Department te hma lo la turin hriattir
Mizoram sawrkar in a din thar, Mizoram Subordinate Services Selection Board (MSSB) Chairman chuan hna zawm tawh mah se Supporting staff ten hna an la zawm loh avang leh lockdown avangin Department hrang hrang ten Mizoram Sawrkar tana Group ‘B’ (Non- Gazetted) post Limited Departmental Examination, Direct Recruit etc. an lo tan laklawh tawh reng reng chu lo thawk zuia DPC pawh lo thut tir a, an promotion case pawh lo tifel (complete) vek turin a hriattir a. Office Memorandum tihchhuah anga MSSSB a thlen lovin, an department DPC kaltlanga lo tih fel (finalise) phalsak an nih thu leh Department in Direct Recruitment, LDE leh promotion case etc. reng reng pawh direct a MSSSB a thehlut lovin DP&AR-ah thehluh phawt tur a ni tih a tarlang bawk.

Puanthui khawl 200 sem
Sports Minister leh Aizawl East-II bialtu MLA, Robert Romawia Royte chuan COVID-19 hripui dona kawngah a bial chhunga Local Task Force Chairman te leh Member-te chu sawrkar laipuiin a duanchhuah Lockdown thawhhnihna Guideline chu May ni 3, 2020 thleng khawng taka kalpui zel turin a fuih a. COVID-19 laka invenna tura sawrkar laipuiinin hmai tuamna (Face Masks) mipuiten vuah vek tura min beisei avangin a bial mipui ten mahni chhungkua leh mi dangte hman tur Face Masks thuia an intodelh theih nan MLA Fund atangin chhungkaw 200 hnenah Puanthui Khawl 200 chu a sem nghal a. Puanthui khawl dawngtute chu an khawl dawn te dah mai mai lova tunlaia mipui mamawh Hmai tuamna tam tak an thuichhuah a beisei thu leh a hnu zelah pawh tangkai taka an hman a phut thu a sawi bawk.

LESDE in hlawh chhunglut
Labour, Employment Skill Development & Entrepreneurship (LESDE) Department hnuaia thawk hrang hrangte chuan an nikhat hlawh tlingkhawm Rs. 2,74,420/- chu nimin khan COVID-19 dona atana hman turin CM Relief Fund-ah an chunglut a. LESDE Department hian COVID-19 hri leng avanga kuthnathawk harsatna tawk te tan Supply Department kal-tlangin April thla khan a thlawna Ration buhfai semin Rs. 6,40,67,820/- sen a ni a, Total lock-down avanga Welfare Board a inziaklut, inkhar-khipna avanga inhlawh theilo te tan Welfare Measure Rs. 3000/- theuh an account-ah thun sakin mi 49,598 hnenah Rs 14,87,94,000/- sn sem-chhuak tawh bawk a ni.

State pawn-ah nuai 158 sem
Tunlai-a hri leng avanga Mizoram pawn-a Mizo tangkhang te tanpuina atan CM Relief Fund atangin Rs. 1,58,36,000/- chu sanction order tichhuakin semchhuah a ni ta a, he sum hi Mizo-ram pawn-a Mizo Welfare leh/pawl hrang hrang 43 hnenah semchhuah niin sawrkar chuan heng sum pek dan kimchang hi a tarchhuak a ni.

Agri. Minister in tlawh
Agriculture Minister, C. Lalrinsanga chuan Lunglei District chhunga khaw hrang hrang tlawh chhunzawm zelin nimin khan Lunglei West chhung leh Thorang bial-a Kawlhawk, Sertlangpui, Serte, South Lungdai, Thuampui leh Vanhne khua te tlawhin Village Level Task Force te a kawm a, tanpuina bungrua leh sumfai pe in COVID-19 dona kawngah ruahmanna hrang hrang a siampui nghal bawk.

Sawrkar in ngaihtuah zel
Mizoram-ah COVID-19 leng palh thei a nih avangin Mizoram sawrkar chuan hmanraw mamawh tur ang a ngaihtuah zel a, tun thlengin rampawn atanga lakluh Personal Protective Equipment (PPE) 2621 bakah Mizoram-a siam PPE 546; N-95 Mask 22,746; 3 Layer Mask 1490, Glove 19,450 leh Mask Mizoram-a siam 7845 a chhekkhawl tawh a ni.

Comments

Chhiar Hlawhte