Latest News

Mumbai Mizoram House-a awm te zingah COVID-19 kai hmuhchhuah belh an ni

Mumbai Mizoram House-a awm mek Cancer vei damlo pahnih (2) leh damlo awmpuitu zing ami pakhat (1) te bakah House-a thawk hnamdang mi pakhat te chuan COVID-19 an kai tih hmuhchhuah a ni a, heti hian Mumbai Mizoram House-a awm leh thawk te zingah COVID-19 kai mi 8 hmuhchhuah an ni ta a ni.
Nimin-a Secretariat Conference Hall, Aizawl-a sawrkar hotu pawimawhte thutkhawmna ah Healh Minister, Dr. R. Lalthangliana chuan he thu hi sawiin, Mumbai Mizoram House-a hmeichhe pakhat in COVID-19 a kai tih hmuhchhuah a nih hnuah April ni 14, 2020-a Mumbai Mizoram House-a awm mi 20 sample test result April ni 18-a hriat a nih khan COVID-19 positive pathum (3) hmuhchhuah an ni tih a sawi a, April ni 18 khan midang la test ve loh zawng, Mizoram House a thawkte telin mi 35 sample test leh a ni a, April ni 19 zan-ah an test result hi hriat niin an negative vek tih a sawi.
Hetih rual hian April ni 19, 2020 khan a hma April ni 14-a sample test zinga negative ho mi 17 bakah House a thawk hnamdang mi la test ve loh te chu sample lak a test leh a ni tih sawiin Health Minister chuan, nimin zing khan heng mite hi an result hriat niin vanduaithlak takin an zinga mi pali – Cancer vei pahnih (2) leh damlo awmpuitu pakhat (a awmpui Cancer vei erawh test a negative thung) bakah House-a thawk hnamdang mi pakhat chu COVID-19 positive an ni tih hmuhchhuah an ni, a ti a. Maharashtra sawrkar in rang taka hma la nghalin Cancer vei COVID-19 positive pahnihte chu COVID-19 natna veite enkawlna tur bika siam damdawi In, Seven Hills Hospital-ah dahluh nghal an ni a, midang pahnih erawh chu Quarantine Facility-ah dah an ni tih a sawi bawk.
Health Minister chuan Mizoram House-a awm leh thawktute zinga COVID-19 natna vei hmuhchhuah tawh zat chu pariat (8) an ni tih sawiin, tun dinhmunah erawh heng natna veite hi ngaihtuahawm an nih loh thu leh enkawlna tha tak an dawn ngei tur thu a sawi a. COVID-19 hi natna tharlam, mithiamte pawhin an zirchian mek, natna chimawm tak leh hriatthiam har tak a ni tih sawiin, sample test negative, a hnu a test that leha positive a ni tih hmuhchhuah leh ang chi ‘false negative’ hi hmun tam takah hmuhchhuah a lo ni tawh tih a sawi bawk. Health Minister chuan COVID-19 veite hming, thlalak leh nihna tarlang thei thil reng reng Social Media leh thildanga puangzar lo turin mipuite chu a ngen nghal bawk.

Comments

Popular News (Last 30 Days)