Thli leh ruah vangin in chhia tam

Inrinni tlai-a Mizoram hmun hrang hranga thli leh ruah thawkin chhiatna a thlen dan hriat belh zel a ni a. Sesawng khua ah chenna In 20 chu luahzui tlak loha chhe vekin Chenna In 63 te chu a chung leh bang thlak ngaiin a chhia a, hliam tuar mi pakhat a awm bawk. Sesawng khua hi nimin khan bialtu MLA leh Assembly Speaker, Lalrinliana Sailo chuan tlawhin chhiat tawkte hnenah hian tanpuina a hlan bawk.

Mamit District chhunga Dampui khua ah pawh thli tleh avang khan chenna In 16 chhiain heng zinga 6 chu chhe nasa zual niin In dang 10 te pawh thawmthat ngai a ni a, nimin khan khawtlang huap hnatlang neiin In chhia thawmthat hna hi thawh a ni.

Aizawl East-I bial, Tuirial, Zemabawk leh Muthi-ah te pawh Inrinni tlai-a thli tleh avang khan chenna In 50 dawn a chhe bawk a, heng chhiatna thlenna hmun te hi nimin zing khan Chief Minister, Zoramthanga chuan a hmunah tlawhin hnatlang te thingpui inna atan Rs. 5000/- theuh a hlan bawk.