Chanchin thar thenkhat :

Motor rawn lut ti thianghlim

Mizoram State pawn atanga nitin mamawh (essential commodities) leh bungraw pawimawh lo luh tanna hmun, Vairengte leh Bairabi-a lirthei lo lutte tih thianghlim (disinfection) hna thawk turin Pathianni khan Fire & Emergency Services te chuan Fire tender pahnih an tirchhuak a, heng Motor te hi Kolasib DC hnena an in report hnuah an hna tur hi an thawk nghal a ni. Ramri kaltlanga Mizoram-a rawn luhna hmun pawimawh pahnih Bairabi leh Vairengte-ah hian motor leh Rel lo lutte chu a remchan dan anga kangthelh motor hmangin damdawi a lo phuh thianghlim thin an ni a, hemi atan hian Kolasib DC hmalakna in Disinfection Team mumal tak din a ni a, hetianga kangthelh motor hman a nih hnu hian mumal zawk leh felfai zawkin Motor tih thianghlim hna hi thawh chhunzawm tum a ni ang.
Khawzawl-ah dawr hawng
Khawzawl District Level Task Force on  COVID-19 in a lo rel tawh angin inkharkhipna kalpui mek a nih laiin nimin atang khan Khaw-zawl District-ah chuan ei leh in bakah mipui mamawh zual zuar zawrhna dawr hawn phalsak an ni a, hmasawnna hna hmanhmawhthlak zual te pawh thawh phalsak an ni bawk. Heng Dawr hrang hrangte hi hawn phalsak ni mah se tlai lamah dar 5:00 thleng bak hawn phal a ni lo thung a, Dawr hi kawngka zimte hawngin a dawrtu turte chu a mal te te-a luh tir an ni a, dawr-a kal turte pawh inhlat taka intlar tir niin chhungkaw pakhat tan kar khat tla tur aia tam lei phalsak an ni lo bawk.

Ramri venhim dan tur sawiho
Rampum-a inkharkhipna kalpui mek a nih laia Saitual District-a ramdang nen-a inrina lai venhim dan tur chungchang sawihona chu nimin khan Ngopa-ah neih a ni a, he hunah hian Sai-tual DC, VL. Hruaizela Khiangte chuan ramri venghim zolo bik nih a hlauhawm thu sawiin, a tuartu chu rampum a nih theih thu a sawi bawk. He thutkhawm ah hian ramdang nena inrina lai venhim dan tur insem fel nghal a ni bawk.

Saiphai-ah chenna In kang
Nimin tlai dar 3:00 vel khan Saiphai khuaa P. Lalromawia te chenna In chu kangin bungrua engmah chuh hman a ni lo. P. Lalromawia te In hi Sept. 13, 2016 khan leimin in alo chhilh tawh a, a hmun ngaiah sa ngam tawh lovin hmundang ah an sa a, tunah hian vanduaithlak takin a kang leh a, kangmei hi an sa repna atanga intan nia rin a ni.

COVID-19 kai awm belh lo
Tunhnaia Mumbai Mizoram House-a damlo mi pakhat in COVID-19 a kai avanga helai hmuna awm ve te enfiah hna thawh chhunzawm ah nizan hmasa khan mi 35 te test result chhuak lehin he hri kai hmuhchhuah belh an awm lova, hemi hmalam hian COVID-19 kai mi 3 hmuh-chhuah an lo ni tawh a ni.

Dy. CM in Union Minister bia
Deputy Chief Minister, Tawnluia chuan nimin khan Union Minister of State for Housing and Urban Affairs, Hardeep Singh Puri chu a bia a, Union Minister chuan COVID-19 Hripui leng dona kawnga Mizoram Sawrkar in NGO, Kohhran leh mipui te tha taka a thawhpui dan a lo hriat thu sawiin, lawmthu a hrilh a. Deputy CM chuan Lockdown in Urban Department Sector a mi harsa (khawpui a cheng mi rethei) te a nghawng dan tlangpui Union Minister hi a hrilh bawk.

Health Minister in Medical Operational Team a kawm
Health Minister Dr. R.Lalthangliana leh Medical Operational Team te chu nimin khan Health Minister Pisa-ah inkawmin tun thla ni 15-17 chhunga Medical Operational Team ten ramri-a Screening Point leh Quarantine Centre an tlawh chungchang an sawiho a. Medical Operational Team hi team li (4)-ah inthenin Mizoram khaw hrang hrang 60 vel an tlawhchhuak a, khua an tlawh chhung hian District lama thuneitute, damdawi lama thawkte, VLTF leh YMA te nen inkawmna hun an nei a, an la tlawh loh ramri a khuate pawh tlawhchhuak vek turin an in ruahman a ni.
Medical Operational Team ten an zinna-a an thil hmuh te hi Health Minister hovin COVID-19 dona kawnga Department kaihhnawih hotute nena sawihona hun neih an tum bawk a ni.

Comments

Chhiar Hlawhte