Chanchin thar thenkhat :

Agri. Minister in VLTF tlawh

Agriculture Minister, C. Lalrinsanga chuan ni 2 chhunga Lunglei District khaw thenkhat te a tlawh hnuah nimin khan Lunglei khawchhunga Village Level Task Force thenkhat a tlawh leh a, Minister chuan COVID-19 dona kawnga Village Level Task Force te mamawh hrang hrang ngaithlain ruahmanna te a siampui a. District Task Force, VLTF-te leh Damdawi In te inpuahchahna felfai tak chu fakin, hrileng mekin engtik thleng nge a awh dawn a hriat lova, kan hnaivai maia awm State leh ram dangah te a pung zel a, kan fimkhur lehzual a tul takzet a ni, a ti a. VLTF-te leh volunteer-te inpekna leh thawhrimna fakawm a tih thu sawiin, an chungah lawmthu a sawi a, CO-VID-19 do zel tura kawng engkima hmalakpui chhunzawm ah a sawm bawk.

Chhawmdawlna pek lawm

Chin Refugee Committee, C-32, Chanakya Place, New Delhi-a Office nei chuan Mizoram Chief Minister's Relief Fund chhawmdawlna pek an nih ve avangin lawmthu an sawi a. Chin Refugee Committee chuan COVID-19 hrileng avanga hnathawk theilo a an awm laia Mizoram mipui ten CM Relief Fund an sum an thawhkhawm atangin Rs. 5,00,000 an lo dawn avangin Mizo-ram mipui leh Chief Minister, Zoramthanga chungah lawmthu an rawn sawi a ni. Tunah hian Delhi ah Chin Refugee hi mi 3000 vel an awm a. Chin Refugee Committee hi January ni 14, 1996 khan din a ni.

Damdawi In leh MZU-ah hlan

Mizoram sawrkar-a Manpower Development Board Vice Chairman leh Aizawl West-I Bialtu MLA ni bawk, Zothantluanga chuan Zir-tawpni khan a bial chhunga damdawi In, Seventh Day Hospital-ah Hmui tuamna (Mask) 300 leh Kutkawr (Glove) 200 pein Ebenezer Hospital-ah Mask 300 a pe a, Civil Hospital, Aizawl pawh tlawhin Mask 500 a hlan bawk. Hei bakah hian Mizoram University-a zirlai tangkhangte chu eitu chi hrang hrang a hlan nghal bawk.

ZLP in FIR an thehlut

Tun thla ni 18-a W. Kawnpui-a Mizoram IR Battalion te duty lai Chakma mipuiin dam-dawi In-a dah ngai khawpa kut an thlak chung-chang leh a hnua luah loh inruak pakhat kang chungchangah Chakma mi thenkhatin dawt thu phuahchawpa Mizote tih hmingchhiat tum zawng leh YMA leh MZP te thiltih anga puha facebook-a thu an thehdarh chiam mai chu chhui chiang a a ti tute man chhuak a, a tul anga action lak a nih theih nan tunkar Zirtawpni khan ZPM Legislature Party chuan Aizawl Police Station-ah FIR an thehlut a, FIR thehluhna ah hian ZLP member mi 4  kalin hetianga ZPM Legislature Party te hmalakna chu ZPM chuan lawmawm an tih thu an sawi bawk.

Bungrua rawn thlen belh

Nimin khan New Delhi atangin COVID-19 dona atana tangkai tur bungrua thahnem tak chu Lengpui Airport-ah rawn phurh thlen leh niin heng te hi Mizoram sawrkar-a Health Department in a chah te a ni a. Heng bungrua rawn thleng te hi Infrared Thermal Sensor (Non-Contact)-235; PCL Rapid test kit (IgM/IgG)-7000; Surgical Three Layer Mask-100,000; Hand Sanitizer (200 ml)-62500 bottles leh Hand Sanitizer (500ml)-500 bottles te niin heng bakah hian sawrkar laipui atanga dawn PPE coverall-100 leh N-95 Mask-480 te, TATA Trust atanga dawn Surgical Three Layer Mask-10,000 leh Surgical Gloves-10000 te a tel a. Heng te hi Indian Airforce thlawhna hmanga rawn phurhthlen a ni.