RD hmalakna sawiho a ni

Nimin tlai khan Union Rural Development Minister, Narendra Singh Tomar hovin State leh UT 11-a Rural Development Minister ten Video Conferencing an nei a, he hunah hian Mizoram Rural Development Minister, Lalruatkima pawh a tel a ni.
He Video Conferencing-ah hian RD Minister te chuan an dinhmun leh mamawhte sawiin, State hrang hrang ten MGNREGS, NRLM leh PMAY-G hnuaia an hmalakna bakah an mamawh te an thlen a, inkharkhipna avanga thing-tlang mipuite harsatna an sawilang bawk a ni.
He hunah hian Mizoram RD Minister, Lalruatkima chuan Mizoram-a thingtlang mipui tam zawkin MGNREGS hnuaia hnathawh chu tun ang hunkhirh taka ei bel berah an ring tih sawiin, Sawrkar kum kalta a ni 100 inhlawh leiba pek tlak nan leh Sawrkar kum kal mek atan advance-a ni 100 hlawh tur sum, a vaia belhkhawm cheng vbc. 168.18 tunhnaia Sawrkar Laipuiin a released chu lawmthu a hrilh a. Hei hian hripui leng avanga thingtlang mipuite harsatna tawh mek engemaw chen a sutkian theih tur thu a sawi a. Sawrkar kum kalta ah RD Block 26 atangin RD Block 25 ah ni 100 inhlawh chu a nihna tur anga ni 100 siam a nih thu leh Block pakhat-ah ni 99 inhlawhna siam a nih thu a sawi bawk a. COVID-19 avanga inkharkhipna kalpui laia, he hripui dona kawnga NRLM hmalakna te sawiin, PMAY-G hnuaia kum 2020-21 atana chenna In 11,581 sak thar tur Ministry in a pawm chu lawmthu a sawi bawk.
Tunhnai khan Mizoram Sawrkarin ni 100 inhlawhna a hnathawkte hlawh Rs. 211 atanga Rs. 225-a a tihsan chu Sawrkar Laipuiin a pawm a. Sawrkar kum 2020-21 a Labour Budget nuai 200 person days inhlawhna tur Mizoram in a rawt pawh pawmin, April 2020-ah hian Job Card Holder 1,97,890 te tan inhlawhna 9,95,724 person days siam a ni tawh a. NRLM hnuaia SHG ten hmaituamna 9600 leh PPE 529 an siam a. SRLM Block 10 huamchhungah AGEY motor 48 in mipui nitin mamawh leh tui in tur sem a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn