Serchhip-ah Bawrhsap hovin VLTF an thukhawm

Nasa lehzuala tan la turin VLTF te sawm an ni

Serchhip District Bawrhsap leh Serchhip District Task Force Committee on COVID-19 a Chairman ni bawk, Dr. Lalzirmawia Chhangte hovin nimin khan Serchhip khaw chhunga Village Level Task Force hrang hrang aiawhte chu thukhawmin Bawrhsap chuan inkharkhip thawh hnihna kalpui mekah nasa lehzuala tan la theuh turin he huna tel te chu a sawm.

Serchhip DC Meeting Hall-a he thutkhawm ah hian Serchhip District Bawrhsap, Dr. Lalzirmawia Chhangte chuan Village Level Task Force (VLTF) ten theihtawp chhuaha hma an lak thin avanga lawmthu sawiin, India ram State dang ten an neih ve loh Village Level Task Force kan nei chu kan vannei hle a ni, a ti a. COVID-19 laka kan him zel theih nan tuna kan tih ang bak hi chu khawvel hian tih dan dang a hre bik chuang lo tih pawh sawiin, a damdawi hmuhchhuah a la nih loh avangin tuna kan hmalakna hi mawlmang viau mahse invenna tha ber a ni rih tih a sawi a. Chuvangin Village Level Task Force te chu theihtawp chhuaha intuai thar sauh sauh turin a chah bawk.
He thutkhawm ah hian Serchhip SDO (Sadar), C. Lalduhzuali chuan COVID-19 dona kawnga District Level a hmalak leh inkaihruaina hrang hrangte a sawi a. State ramri pela bungraw la tur chuan Home Department phalna lak a ngai a, Essential Commodities bik la tur chu phalna hranpa ngai tawh lovin a kal theih thu leh ramri a Checkgate ah erawh an inhriattir a tul thu a sawi a. State pawn atanga bungraw daha lokal driver chu a bungrua te a hlan thlak zawhah haw leh nghal tur an nih thu leh, State chhung a mi, State pawna bungraw phurtute erawh chu mipui nena inawmpawlh zui a rem loh avangin a inkhunghran zel a tul thu a sawi a. Hnamdang tangkhangte hnenah District pawisa atanga chhawmdawlna pek a la ni lo tih pawh sawiin, an chenna khawtlang hruaituten an chhawmdawl thin thu a tarlang bawk.
He hunah hian Serchhip BDO, Vanlalhma-chhuana MCS pawhin sawrkar hmalakna te tarlangin, ei leh bar chungchangah Supply Chain Committee din a nih thu leh ei leh in-a District dinhmun thlithlai reng a nih thu a sawi a. PMUY atanga mi harsa zawk ten thla thum (3) chhung eirawngbawlna Gas an lo lak ve na tur an Bank Account-ah pawisa thun sak an nih thu te, PMJDY atangin hmeichhe te an Bank account-ah thla thum (3) chhung thla tin Rs. 500 dah sak thin an nih tur thu te a sawi a. Mizoram Building and Other Construction Workers Welfare Board in an hnuaia inziaklutte Account ah Rs. 3000/- an thun sak thu pawh sawiin, heng tanpuina dawng thei te zing ah an Bank Account-ah tanpuina hi a lo la lutlo anih chuan lo bengvar sak turin VLTF hruaitute hi a ngen nghal a ni.
Hei bakah hian nitin mamawh bungrua, phailam-a zuk lakna a to thut hlawm avangin Serchhip-ah MRP anga lei beisei theih loh bungrua a awm nual thu pawh sawi langin, chutihruala man to uchuaka hralh an awm chuan thuneitute hnena thlen zel tur a nih thute a sawi bawk a. Eirawngbawlna Gas hnianghnar kan neih theih nana theihtawpa tan lak reng a nih thu leh, Connection nei tam leh Gas bur nei tam zawk ten midang ken nachang kan hriat tlan a tul thu a sawi bawk.
He thutkhawm ah hian Serchhip District SP, R. Sathiyasundaram IPS leh Addl. DC, HD, Lalpekmawia te pawh telin Serchhip khawchhunga Village Level Task Force (VLTF) zawng zawng aiawhte an kal kim bawk a, tha zawka inkharkhipna kalpui anih theih nan rawtna hrang hrang an neihte ngaihthlak niin, an huam-chhung theuhah khauh zawka inkharkhipna kalpui theuh an tum thu an sawi hlawm a. Lo lam-a hnathawk kal tur Permit pek uluk zawka kalpui a tul thu te, inkharkhip chhunga luidung-a nungcha lo suasam thin an awm avanga Duty tur inruat dan tur leh Permit nei lova chhuak an awm loh dan turte pawh sawiho a ni bawk.

Comments

Chhiar Hlawhte