Vidoe Conference-ah Chief Minister a tel

COVID-19 hrileng kara mipui him tlanna tura transport kalpui danah leh Highway lama State hrang hrang dinhmun sawipuiin Union Minister of Road Transport & Highways changtu, Nitin Gadkari chuan Video Conference a buatsaih.

He Video Conference-ah hian Mizoram atangin PWD changtu Chief Minister, Zoramthanga leh Transport Minister, TJ. Lalnuntluanga te telin Ministry atanga sawihawnna neih hnuin State hrang hrang te chu thusawi tura koh an ni a. Mizoram Chief Minister chu thusawi tura koh hmasak ber niin Chief Minister chuan National Highway a hmalakna khaihlak mek chhunzawm a tul thu te, Mizoram sawrkar in a kawng siam chungchang thu a rawtna chi hrang hrang Ministry a lo thlen tawh chungchang te a sawi bawk.

Chief Minister chuan Mizoram chu State dang motor lian thil phur ten kaltlangna atan an hman loh avangin kan vanneih thu a sawi a. Kan mamawh chin chiah motor intir a, kan duh chin chiah motor control thei a State kilkhawr a kan awm hi lehlamah chuan a vanneihthlak hle a ni, a ti a. Hemi a nih avang hian Road Transport avanga natna hrik inkai darh hlauhawm chungchangah pawh Mizoramin harsatna kan neih lutuk loh thu a sawi. Chutih rual chuan ramri venhimna hna uluk taka kalpui chhunzawm zel a tul thu leh  COVID-19 dona ah Mizoram mipuite an tan nasat zia te, an lungrual tlan thu leh State dangte tan pawh a entawntlak a nih thu te Chief Minister chuan a sawi bawk.