India ramah COVID-19 test leh vei an tam zel

Indian Council of Medical Research (ICMR) tarlan danin India ramah COVID-19 vei ni a inringhlel, thisen test mi 579,950 an awm tawh a. Heng thisen test hi ramchhung hmun hrang hranga sawrkar leh Private Laboratory-ah te neih thin a ni a.Thisen test na hmun hi neih belh zel tum niin tun dinhmunah sawrkar Laboratory 272 leh Private Laboratory 87 chu COVID-19 test thei tura phalna pek an ni tawh a ni.

Hetihlai hian Union Health Ministry tarlan danin India ramah COVID-19 hri kai hmuhchhuah zat chu 26,917 an tling tawh a, Damdawi In-a enkawl mek mi 20,177 awmin mi 5,913 enkawl dam an nih bakah rampawn-a thawnchhuah mi 1 a awm bawk a, he hri kai nunna chan mi 826 an tling tawh bawk. Health Ministry tarlan danin ni 14 kalta chhung khan India rama District 80-ah COVID-19 vei hmuhchhuah thar an awmlo bawk a ni.