Latest News

COVID-19 avanga sum hmanna CM in a tarlang

COVID-19 puala Chief Minister Relief Fund a sum tlingkhawm atangin tanpui hna thawh nan Rs. 457,86,500/- hman a ni tawh a, State Budget atangin cheng nuai 5000 chuang hman a ni tawh bawk.
Chief Minister, Zoramthanga chuan nimin khan mipuite hnenah thuchah sawiin he thu hi a tarlang a, Chief Minister chuan Mizoram puma cheng te tanrualna zarah hripui hi do tlang theih beisei a ni tih sawiin, COVID-19 puala CM Relief Fund a sum thawh tlingkhawm zat atangin tunhnaiah Rs. 227,86,000/- pekchhuah a ni tih sawiin, a hmain Task Force chi hrang hrang leh Home-ah te cheng nuai 230 an pe chhuak tawh bawk tih a sawi.
Health Department hi a hmain cheng nuai 50 pek an nih thu leh COVID-19 hripui avanga inbuatsaih nan vbc. 5 pekchhuah leh niin, hei bakah hian Damdawi In-a ICU siam nan te, a hmanraw lei nan te leh hnathawktu lak belh nan te cheng nuai 660 leh State Disaster Relief Fund atangin nuai 350 dah a ni bawk tih a sawi a, heti hian Health Department-a sum dah hi CM Relief Fund tel lovin cheng nuai 1515.50 a nih thu a sawi a. Supply Department in chhuanchham awm lova mi zawng zawng a tuam kim theih nan tunhnaiah cheng nuai 300 chuang sanction a ni tawh tih Chief Minister chuan a sawi a, hei bakah hian ni 100 inhlawhna ah cheng nuai 5200 vel dah a ni a, State Fund pangngai te, Central Scheme atangte pawhin nasa taka insiamrem a ni, a ti.
Chief Minister chuan State chhungah rampawn mi 1748 an awm mek tih sawiin, heng mi te hi State Level atanga Local Task Force thlenga tangho in an buaipui a, eitur an tum sak reng tih a sawi a, anni bakah hian Mizoram pawna tangkhang Mizo te mai bakah Chin mi te thlengin an buaipui a, Chin hnam te tanpuina atana hman turin cheng nuai 5 an dah tih a sawi. Hetihlai hian State pawna tangkhang Mizote tanpui nan theihtawp an chhuah mek tih pawh sawiin, tunah hian khawpui leh a te deuhte a tangkhang tanpui nan Rs. 158,36,000/- an pechhuak tih a sawi a, State danga tangkhang te hi Mizo Welfare kaltlanga tanpui an nih thu leh Welfare neilo pawh Welfare an siam tir tih a sawi.
Mizoram House a thleng te tan thlenman chawi ngai lo turin sawrkar chuan order a tichhuak tawh tih pawh sawiin Chief Minister chuan, a thleng chauh ni lo, pawn lam atanga ei leh in tur va lam an awm bawk avangin, an ni zingah pawh a pe theilo an awm anih chuan a thlawna ei tir an ni tih a sawi a, hei bakah hian Mumbai Mizoram House-a thleng mek te test nan Rs. 2,52,000 pek an nih thu a sawi a. State ramri leh International border a duty te tan tun dinhmunah cheng nuai 57 an semrual thu leh tunhnaiah Home leh Centre hrang hrang 24-ah Rs. 2,98,500/- an pe tih a sawi bawk.

Comments

Popular News (Last 30 Days)