Mizo IR Sipai kutthlaktu man thuai turin MZP in Mizoram sawrkar an phut

MZP General Hqrs. chuan ram leh hnam himna tura Mizo IR Police duty kut thlaktute chu a rang thei ang bera man tura Mizoram sawrkar an phut thu sawiin, “IR duty kut thlaktute hi sawrkarin a man lo a nih chuan Chakma misualte man turin Mizo thalaite kan che chhuak nghal ang,” an ti.

Mizo Zirlai Pawl (MZP) General Hqrs. hian nimin chawhnu khan Aizawl-a MZP Office-ah General Headquarters OB's leh Advisers thutkhawm hmanhmawh neiin April ni 18, 2020 (Inrinni)-a New Kawnpui-a COVID-19 laka kan ram leh hnam himna tura 5th IR duty C. Lalhruaitluanga s/o C. Lalnunsanga, Republic Veng leh R. Zairemmawia s/o R. Vansawma, Hlimen Veng ten Chakma misualte kut an tuar chu thinurthlak an tih thu leh an lawm lo hle tih an sawi. MZP chuan Mizoram chhung ngeia Chakma misual ten Mizo tlangval, Mizoram mipuite himna tura duty, Uniform ha lai lehnghal kut an thlak chu na an tih thu leh an dem takzet thu sawiin, Tripura leh Mizoram inrina-ah hian fimkhur zâwkna avangin Tripura lam Chakma te hi rawn duty tawh lo se an duh thu an sawi a, Mizoram sawrkar chu Zomuantlang-a Police OC (Chakma) chu a rang thei ang bera sawnchhuak tur an phut thu sawiin, darkar 24 chhunga Police Force duty tur tam zawk dah belh turin sawrkar an phut thu an sawi a. Ram leh hnam himna tura Mizo IR duty kut thlaktute chu a rang thei ang bera man nghal tura sawrkar an phut thu pawh sawiin, “IR duty kut thlaktute hi sawrkarin a man lo a nih chuan Chakma misualte man turin Mizo thalaite kan che chhuak nghal ang,” an ti bawk.

MZP General Hqrs. hian heng an thurel hrang hrangte hi nimin tlai khan Home Minister, Lalchamliana chu a chenna In-ah hmuin an thlen nghal a, Chakma kut tuar nia hriat heng IR Sipai te hi Aizawl Civil Hospital-ah lo hmuakin, an inelna tumsak tura sawrkar an phut thu an sawi bawk.

Thudawn danin Zomuantlang hi Mizo-ram leh Tripura Border kawngpuiin a dai dan niin kawngpui chhuah lam hi Mizoram niin tlaklam hi Tripura a ni thung a. Mizoram chhung lam hi Zomuantlang VC hnuaia awm niin Bru (Tuikuk) an khawsa a, Tripura lamah erawh Chakma ho an khawsa ve thung a. Helai hmunah hian Inrinni khan Mizoram IR Sipai 2, C/276 C. Lalhruai-tluanga (32) leh C/405 Zairemmawia, Hlimen te an duty bakah anmahni tanpui hian New Kawnpui leh Zomuantlang Village Level Task Force (VLTF) mi 4 an awm bawk a. Task Force mite hian lehkha dengin, Police duty-te hian vawi tam tak lehkha deng tawh lo turin an hrilh a, an tawp duh chuang lova. A hnuah VLTF duty zinga pakhat hian ral leh lam, Tripura-a a thiante va sawmkhawm in Police duty te chu hriamhrei hmangin an bei ta a ni.

Tripura Police rual khat chu Additional SP leh Vanghmun SDPO kaihhruaina hnuaiah Mizoram-ah an rawn lut a, Police kutthlaktute hi an hnawtdarh ta a. Tunah hian boruak thalo a awm tawh rih lo ni a sawi a ni. New Kawnpui Border Outpost-a Post Commander chuan he thil thleng hi a ngawihpui rei deuh a, Inrinni zan dar 9:00 vel khan West Phaileng Police Station OC a hriattir chauh ni a thudawn a nih thu AIR chuan a puang bawk a ni.

Helai hmuna thil thlen dan a hmuna en-fiah turin nimin khan Mamit atangin Police Officer rual te chu SP hovin an kal nghal a ni.

He thil thlenga hliam tuar IR Sipai 2 te hi West Phaileng PHC panpui an nih hnuah nimin vek khan Aizawl Civil Hospital rawn thlenpui an ni a, Health Minister, Dr. R. Lalthangliana chuan heng mite hi tlawh nghalin thlaphang lo tur leh puih an ngaihna apiangah amah be turin a chah a, hetianga ram leh hnam tana duty ten kut an tuar chu pawi a tih thu sawiin, tunhnuah a thlen nawn tawh loh a beisei thu a sawi a. I&PR Minister, Lalruatkima leh Sports Minister, Robert Romawia Royte te pawhin damdawi In ah hian an tlawh nghal bawk.