COVID-19 Medical Operational Team te zirchianna bawhzui dan tur sawihona neih a ni

COVID-19 Medical Operational Team ten tunhnaia Mizoram hmun hrang hrang tlawha an thil hmuh dan sawrkar hnena an thlen te chu nimin khan Health Minister, Dr. R. Lalthangliana hovin sawrkar hotu pawimawh ten Secretariat Conference Hall, Aizawl-ah an thlirho.

COVID-19 Medical Operational Team hian an Chairman Dr. Z.R. Thiamsanga, MLA hovin Team 4-ah inthenin April ni 1, 2020 atanga April ni 18, 2020 tleng khan district panga – Mamit, Kolasib, Saitual, Khawzawl leh Champhai an tlawh a, khaw hrang hrang 40 chuang tlawhin ramri-ah Border Check Post te an tlawh a, heng an zinchhuahna-a an thil zirchian zingah hian an kal chinah chuan District Hospital, Primary Health Centre (PHC) leh Community Health Centre (CHC) ten COVID-19 hmachhawn tura an inpuahchahna a tha thawkhatin an hria a, thawktute pawh training pek that zel a pawimawh tih an sawi a. Hmun hrang hranga Quarantine Facilities te tihlen tul-a an hriat thu leh ramri-a vengtu leh damdawi lam thawktu dahbelh bakah ramri vengtu Police leh Village Level Task Force (VLTF) te harsatna tawh leh mamawh chi hrang hrang chungchangah rawtna engemawzat an siam a ni.

Nimin-a thukhawm hian ramri vengtu sipai dah belh dan tur te ngaihtuahin, a theih ang anga hmalak an rel a, ruihhlo ngai damdawi zawnga ramri lo kan pawh kil tinah an awm avangin hemi ven hi thil hautak tak a nih bakah ruihhlo ngaite khuahkhirh a pawimawh a ni tih an sawi chu ngaihtuah a ni a, Health Department, Social Welfare Department leh Home Department nen pawh uluk zawka ruahmanna siam tul a hriat niin Social Welfare Department hotute chuan Sethawn-a ruihhlo ngaite enkawlna hmun chu a tul anga hman theih turin ruahmanna siam mek a ni tih an sawi bawk.

He hunah hian Police hotute pawhin ramri-ah VLTF 198 an duty thu leh Mizoram Police pawh ramri hmun 143 ah an duty mek thu an sawi a. Police ramri a duty hi mi 700 bawr vel an nih thu sawiin, an in dah belh mek zel tih an sawi a. Tripura ramri, tunhnaia buaina kan tawh mekna hmunah pawh Police Company khat duty turah tirh belh mek an nih thu an sawi bawk.

Ramri a duty, a bikin VLTF te hriselna leh taksa tih chak bakah ei leh in tur mumal taka pek an mamawh zia hria in an mamawh ang te awlsam zawka pek dan tur pawh ngaihtuah a ni a, hmun kilkhawr zawk, Mobile Phone signal awmlohna hmuna duty VLTF te hman tur Radio Communication System pawh a tul anga ngaihtuah a ni dawn a ni. Heng bakah hian mipuiten pawn an chhuah a hmai tuamna (mask) an vuah zel a pawimawhzia uar zawka mipuite hrilhhriat a tul thu tarlan a ni bawk.