COVID-19 Medical Operational Team in Hnathial an tlawh

COVID-19 chungchanga hmalakna leh dinhmunte zirchiang tura Mizoram hmun hrang hrang tlawha zin kual mek, COVID-19 Medical Operational Team te chuan nimin khan Hnahthial tlawhin Hnahthial District Task Force Chairman leh District Bawrhsap ni bawk, Vanlalmawia kaihhruaiin District Hospital OPD Building-ah inkawm-hona an nei.
He an inkawmna ah hian COVID-19 Medical Operational Team Chairman, Dr. ZR. Thiamsanga MLA chuan District Level Task Force leh Village Level Task Force hmalakna te chu lawmawm a tih thu sawiin , Mizoram hmun hrang hrang an tlawhna a an thil hmuh dan sawrkar hnena an thlen chuan sawrkar beng a verhin a ngaih pawimawh thu leh a theih ang anga sawrkar in a bawhzui avanga lawmawm a tih thu a sawi.
Dr. ZR. Thiamsanga chuan he natna do kawngah Mizo mipui nawlpui pawh kan thang-harhin midangte tanpuina kawngah te kan inhawn zau zia a lang chho zel tih sawiin, tlawmngai taka duty VLTF te chu fakawm a tih thu a sawi a, Hnahthial District Task Force hmalakna chu lawm-awm leh tha a tih thu a sawi bawk.
He hunah hian Hnahthial District Task Force-a Member Secretary, Dr. Lalrengpuii Ralte chuan an hmalakna hrang hrang report pein Medical Operational Team Expert Member-ten mipuite hriattur tul leh pawimawh te sawiin, zawhna leh chhanna hun hman nghal a ni. Medical Operational Team hian Hnahthial DLTF-ah hian Hand Sanitizer leh Mask engemawzat an hlan a, Hnahthial DLTF pawhin an mahni siam chhuah Mask 50 an hlan ve bawk a ni.
He inkawmna an neih zawh hnu hian CO-VID-19 Medical Operational Team hian Hnahthial District chhunga ramri hrula awm khaw hrang hrangte tlawh turin Hnahthial an chhuahsan leh nghal a, heng khaw hrang hrangah te hian VLTF te hnathawh dan leh an dinhmun bakah harsatna an neih te an enpui leh dawn a ni.

Comments

Chhiar Hlawhte