Chief Minister’s Relief Fund atangin Cheng nuai 78.90 hmanchhuah dan tur rel a ni

COVID-19 dona atana Chief Minister’s Relief Fund a sum lut te hman dan tur ngaihtuah tura din, Committee on Utilization of Chief Minister’s Relief Fund for COVID-19 chu nimin khan thukhawmin rampawn-a Mizoram mi tangkhang leh ramchhung-a Duty te puihna atan Rs.78,90,000/- hmanchhuah nise an ti.

Nimin-a Chief Secretary’s Conference Hall, Aizawl-a Committee on Utilization of Chief Minister’s Relief Fund for COVID-19 thutkhawm hi an Chairman Mizoram Chief Secretary, Lalnunmawia Chuaungo chuan kaihruaiin India ram State hrang hrangah thiam thil nei hranloa inhlawh leh mi hnuaia thawk (unskilled worker), Mizorama nu leh pa leh chhungte pur tur nei miahlo, an hlawhchhuah hmanga chhungte chawmtu zawk mi engngemawzat an awm thu a sawi a. Lockdown avanga hna chan, thawhchhuah nei tawh si lo heng mi mangangte hi hmun hrang hranga Mizo Welfare pawl ten anmahni sum thawhkhawm hmangin chhawmdawlna an lo pe tawh thin a. Heng mite bakah hian damlo leh chhan dang vanga tangkhang, harsatna namenlo tawk mek, mamawhtu tak takte hnenah sum a ni emaw, ei leh in tur a ni emaw, an lo pek chhunzawm theih nan Welfare pawlte hnenah CM Relief Fund atanga sum pekchhuah an nih thu sawiin, CM Relief Fund atanga sum pekchhuahte hi Welfare pawl ten a daihzai thei ang bera an hman a, mi mangangte tanpuina turin tul leh tha an tih anga an sem chhuah tur a nih thu a sawi bawk.

Nimin a Committee on Utilization of Chief Minister’s Relief Fund for COVID-19 thukhawm hian ramchhung State leh hmun hrang hrang 26-a Mizoram mi tangkhangte hnenah Rs. 75,90,000/- semchhuah tura relin hei hi chhawmdawlna dawng tawh ten an dawn nawn tur ni lovin a thawhkhatnaa in report ve lo mi engemawzat harsatna tawk in report thar ten tanpuina an dawn theih nana pekchhuah a ni.

Hei bakah hian he Meeting hian Mizo-ram ramri dep-a mi tlawmngai duty te mamawh zual phuhrukna turin Champhai, Kolasib leh Mamit YMA Sub-Headquarters-ah CM Relief Fund atangin Rs.1,00,000 theuh dah nise an ti bawk a, heti hian tun tuma CM Relief fund hman chhuah tur zat an rel chu Rs.78,90,000/- (Rs, 75,90,000 + Rs.3,00,000) a ni.

Committee on Utilization of Chief Minister’s Relief Fund for COVID-19 hian hmun hrang hranga Mizoram mi leh sa tangkhang te in report-na tura tangkhang.mizoram.gov.in sawrkar in a siam chu tihtawp lailawk nise an ti a, a tul dan a zirin tihnun leh tur a ni ang.