Chief Secretary hovin Bawrhsap ten mipui mamawh bungraw phurh chungchang an sawiho

Mizoram Chief Secretary, Lalnunmawia Chuaungo hovin Mizoram chhung District hrang hranga Bawrhsap te chuan nimin khan Video Conference neiin Inter-State leh Inter-District kaltlanga Essential Commodities leh Non-Essential Commodities phurh chungchang bakah thil pawimawh hrang hrang an sawiho.

He sawihona hunah hian Chief Secretary, Lalnunmawia Chuaungo chuan COVID-19 a darh zel lohna tura sawrkar leh mipuite tanrualna fakawm a tih thu sawiin, “Hei hian nasa takin he hri dona kawngah hian min pui a ni,” a ti a. Ramri-ah Dan lova lo lut turte veng turin Village Level Task Force (VLTF) te chhun zan zawmin an duty thin chu fakawm a tih thu sawiin, a bik takin YMA, YLA leh MTP ten an thawhhlawk hle a ni, a ti a. Hetih rual hian Essential Commodities leh Non-Essential Commodities phurtu Driver leh Handyman thahnem tak phalna neiin Mizoram-ah an rawn lut reng lo theilo tih sawiin, ramri an lo luhna hmunah uluk taka Medical Screening tih a ni chungin an zinga COVID-19 vei an lo awm palh a hriatchhuah a nih veleh rang taka Contact Tracing leh a tul anga hmalak zung zung a nih theih nan mipui nitin mamawh Essential Commodities ni lo, bungraw dang Mizoram-a phurh luh phalna, Inter-State Movement Permit online-a dil theihna, mPASS chu ICT Department chuan mCOVID-19 Mobile Application-ah an telh belh a ni, a ti a. Bungrua rawn phurluttu ten an bungraw phurh chu khawi atanga lak nge a nih a, an pekna hmun leh tu hnenah nge an pek tih bakah an address kimchang leh contact number te mPASS hmang hian chhinchhiah vek a ni, a ti bawk.

Chief Secretary chuan mPASS chu Inter-District (district dang a bungraw phurhluh/chhuah) bungraw thiar veltute vil zuina tangkai tak a nih bakah District danga bungraw phurtu ten awlai taka phalna an lak theihna tur atana duan a nih thu a sawi a. Lockdown chhunga inkaihhruaina Dan siamah bungraw chawkluh leh thiar chungchang pawh siam that niin “Mizoram chhunga bungrua awmsa hmundanga phurh sawn dawnin a bungraw phurh tur te awmna hmun District Deputy Commissioner ah phalna lak tur a ni ang,” tih chu dah belh a nih avangin Distict danga bungraw phurh-sawn tur chuan an awmna District Bawrhsap hnenah mPASS hmang hian bungraw phurh phalna an dil ngei a ngai tawh dawn a ni, a ti bawk.

Hei bakah hian Chief Secretary chuan District hrang hrang Bawrhsap te chu an bial chhungah Telecom Service mumal tak a awm reng theih nan uluk taka lo enzui a, a tul anga hma la zel turin a chah bawk.