New Serchhip South VLTF ten an mawhphurhna leh hmalakna an titawp

New Serchhip South Village Level Task Force on COVID-19 chuan sawrkar hnena an lungawilohna an thlen ah hmalakna leh thu lawmawm engmah hmuh tur leh hriat tur a awm loh avangin nimin tlai dar 5:00 atang khan New Serchhip South Village Level Task Force anga an mawhphurhna leh hmalakna chu an titawp tih an sawi.

New Serchhip South VLTF hi nimin, April 23, 2020 tlai khan New Serchhip YMA Hall-ah inhmukhawmin hemi hnua thuchhuah an siamah New Serchhip South VLTF-in sawrkar dan leh thupek a kenkawhte pawisa lova Rimawia, IOC Veng-in hma a lak reng chungchanga an lungawi lohna ziak leh tawngka-a thuneitute hnena vawi engemawzat an thlen tawh chunga an ngenna tihlawhtling tura thuneitute lam atanga hmalakna hmuh tur leh hriattur a awm tak loh avangin COVID-19 laka mipui himna tura an hmalakna chuan awmzia a neih loh bakah thuneitute hnen atanga thlawpna an dawnglo nia hria-in, VLTF anga an hmalakna leh mawhphurhna chu nimin tlai dar 5:00 atanga thu leh awm hma chuan tihtawp nise an ti ta tih an tarlang a. Hemi avanga mipuiin harsatna an tawk a nih pawhin mipui hriatthiamna an dil tih sawiin, mipuiten ei leh bara harsatna an neih pawhin VLTF-ten mawh an phur dawn lo tih an sawi bawk a ni.
Thudawn danin New Serchhip South VLTF hian niminpiah (April 22, 2020) zing dar 7:00 khan Rimawia, IOC Veng-in VLTF thu a bawhchhiat chungchang hi an ngaihtuah a, heta an thurel bawhzui hian nimin khan District Bawrhsap hnenah an lungawi lohna thu hi ziaka thehlutin thuneitute pawh an hmu nghal a. District Bawrhsap hnena lehkha an thehluh ah hian an huamchhung (New Serchhip Venglai)-a In sa mek, Rimawia, IOC Veng, New Serchhip chuan lockdown kalpui tan a nih atang khan a In sak a chhunzawm char char tih tarlangin, lockdown vawi hnihna kalpui a nih hnuah In sa turin DC atanga phalna lak hmasak tur tih a ni chungin DC atanga phalna a neih hma pawhin In sak a chhunzawm thu leh In sak phalna a neih hnu pawhin dân kalhin In sak a chhunzawm zel tih an tarlang a, VLTF-ten Dan anga hna thawk tura vawi engemawzat an ngen hnuah pawh VLTF-te runluih zawngin a che nia sawiin, Magistrate-te hnena hemi chungchang an thlen pawhin dan anga hmalakna an hmu lo tih an sawi.
New Serchhip South VLTF chuan Rimawia hian VLTF-te a bum nia tarlang bawkin, a In sak mekah mi 5 aia tam lo chhawr tur a nih laiin mi 21 aia tam hna a thawhtir niin an sawi a, hmanrua lakchawp phal a nih loh laiin VLTF duty-te bân hnuah bungrua a lalut niin an sawi bawk a. VLTF ten khawtlang himna ngai pawimawha mitin In sa chhunzawm lo tura an ngen hnuah pawh Magistrate leh SDO (Sadar)-ten sa chhunzawm tura an tih thu a sawi laiin, VLTF-ten an zawh-chianna ah SDO (Sadar) chuan chutiangin a ti lo niin a sawi tih an tarlang bawk a. A chet dan chu mipui himna tiderthawng zawng a nih thu te, a dan bawhchhiat thu hi Magistrate hnenah vawi engemawzat thlen a ni tawh chunga dân anga hmalakna a awm lo chu an lungawi loh thu leh a chhan zawnchhuahsak turin DC hi an ngên a. Amah (Rimawia) hi sawrkar hnathawk a nih thu leh sawrkar hnathawkin sawrkar thuchhuak a zawmlo leh khawtlang inkaihhruaina zawm lova khawtlang tana duty-te pawh a zahlo chu an khaw-tlanga awm atan an duhlo tih sawiin, transfer nghal tura an phût thu an tarlang bawk.
Hetianga thuneitute hnena lehkha an thehluh hnuah pawh hian District thuneitute hnen atanga chhanna an hmuh leh an hmalak tum danah lungawina tur an hmuh loh avangin VLTF anga an hmalakna leh mawhphurhna chu tihtawp nise an ti tih an sawi a ni.
New Serchhip VLTF huamchhungah hian New Serchhip Venglai Branch YMA leh Chhekhnai Branch YMA te awmin hmun 2-ah Duty Point an siam a ni.

Comments

Chhiar Hlawhte