Chanchin thar thenkhat :

Fund pekchhuah dan tur rel

LAD Minister, K. Lalrinliana chuan tunhnai khan a Pisa-ah LAD Officers te kawmin 1st MFC Grant leh Excluded Areas Grant pekchhuah dan tur an sawiho a. He Meeting hian Local Administration Department hnuaiah Village Council te'n khawtlang hmasawnna atana hna an thawhna turin 1st MFC Grant leh Excluded Areas Grant pek chhuah leh thuai anih theih nan hmalak ni se tiin 1st MFC Grant leh Excluded Areas Grant hmanga hna thawh a nih hunah COVID-19 avanga mipuite'n harsatna an tawh chhawk zangkhai nan khaw mipui tam thei ang ber an inhlawh theihna tur leh a remchan dan anga hnathawh tur te pawh buatsaih nise an ti bawk.

House-a tangkhang ei man pe

Mizoram Chief Minister remtihna leh Committee on Utilization of Chief Minister’s Relief Fund in alo rel tawh angin India ramchhung Mizo-ram House hrang hranga mikhual tangkhang ei man pe theilo mi 161 te ei man Rs. 7,60,565/- chu pek tlak a ni a. New Delhi-ah khualzing tangkhang tam berin mi 37 tan Rs. 1,24,395/- pek a ni a, Kolkata (NewTown)-ah sum pek tam berin mi 32 tan Rs. 3,29,100/- pek a ni thung a, heng bakah hian Kolkata (Salt Lake)-ah mi 13 tan Rs. 2,14,200/-; Bengaluru-ah mi 18 tan Rs. 75,900/-; Guwahati-ah mi 1o tan Rs. 6,570/- leh Shil-long-ah mi 3 tan Rs. 10,400/-pek a ni bawk.

Doctor ten sawihona nei

Indian Medical Association (IMA) leh Mizoram Govt. Doctors' Association huai-hawtin nimin khan Civil Hospital, Aizawl Conference Hall-ah Mizoram hmun hrang hranga Doctor rualin lockdown kal mek zawha awm zel dan tur atana ngaihtuah ngai thil chi hrang hrang sawihona, 'Consultation on Covid19 : Post Lockdown Strategy' hun an hmang a. He hunah hian mithiam pali (4) te paper buatsaih chu zirho a nih bakah sawihona neih a ni a, he sawihona atanga an thutlukna te chu sawrkar-ah an thlen dawn a ni.

Vivian-a ruang vuiliam a ni

Ningani kalta zan-a Chennai, Tamil Nadu-a boral, Vivian Lalremsanga (28) s/o Kenneth Lal-thuamliana, Model Veng Aizawl ruang chu nimin khan Ambulance hmangin Aizawl-a an chenna In thlenpui a ni a, nimin vek khan vuiliam nghal a ni. Vivian Lalremsanga ruang hi Chennai atangin Rafael AVL. Malchhanhima chuan rawn zuiin ani leh a ruang phurhna Motor rawn khalhtu Driver 2- Jeyantjiran leh Chinnathambi te chu Mizoram sawrkar aiawhin Dr. K. Beichhua, Minister chuan Rs. 2000/- theuh a pe a ni.

Lemziak thiam Award hlan

Mizo lemziak thiam, Art Novelty Gallery neitunu leh Mizoram Art Development Society member, Lalhmingmawii (Amawii) chu lemziakte chawimawina Wallace Hartley W.A.D. Award hlan a ni. He Award hi International Association of Art chuan April 15, 2020 World Art Day pualin an hlan a ni. Amawii hian Tribal te hnam ziarang chawisang turin a painting hmangin hna a thawk thin a, India ram hmun hrang hranga Art Exhibition leh Festival ah te a lo tel tawh thin bawk a ni.

Sample 12 test leh a ni

Nimin khan Falkawn-a COVID-19 Testing Laboratory-ah Sample 12 test leh niin a vai hian a negative vek a, heng zingah hian Vairengte atanga Sample lak 9 pawh a tel a ni. Nimin a Sample Test te nen hian Falkawn-a COVID-19 Testing Laboratory-ah Sample 99 test a ni tawh a ni.