Lenkawl

PWD Serchhip Divison hnuaia tunhnaia hmalakna hrang hrang kalpui mek pali (4) te chu nimin, Feb. 27, 2026 khan Mizoram Journalists' Association (MJA) Serchhip District Member te chan tlawhin hnathawh mek leh hnathawh tawh chin te an enpui a, hnathawktute chu a tha thei ang bera an hna thawk turin an chah bawk.

Serchhip District-a Rural Development and Administration Department chuan an hmalakna hrang hrang thlirletna hun nimin khan Serchhip DC Pisapui Hall-ah hmangin Bawrhsap Paul L. Khuma chuan a hmanpui a ni.

Serchhip District atanga Vibrant Villages Programme II (VVP II) atana khaw thlan pasarih te Draft Action Plan chu nimin khan Serchhip-ah Bawrhsap Paul L. Khuma hovin thlirho a ni.

United Pentecostal Church-North East India (UPC-NEI) Serchhip Bial Mission Department kum 50-na lawmna chu nizan atang khan UPC Biak Inpui, Serchhip-ah neih a ni. Serchhip Bial Mission Department Golden Jubilee lawmna hi nizan khan Pastor C. Lalchhuanga, Bialtu Pastor in hawngin tan a ni a, Vawiin hian chawhma dar 11:00-ah Jubilee Lungphun hawnna neih tur niin Jubilee Dar vuak zui a ni anga, hemi hnu hian Jubilee lawmna Inkhawm neih zui tur niin Bial Mission chanchin te ngaihthlak a nih dawn bakah hruaitu hluite chawimawina hlan an ni anga, tlai lamah Jubilee lawmna ruai kilho nghal a ni ang. Jubilee lawmna Inkhawm hi zan lamah chhun-zawmin naktuk, Pathianni zan thlengin neih a ni ang.

Kum kal mek, 2025-2026 chhungin Mizoram tlawhtu khualzin an pung mek zel a, April 2025 atanga December 2025 chhungin khualzin 6,79,607 awmin Rampawn atanga Mizoram tlawhtu zingah Myanmar atanga tlawhtu an tam ber.

School Education Minister Dr. Vanlalthlana hova School Education Department leh Zirtirtu pawl hrang hrangte niminpiah-a Minister Pisa-a thukhawm chuan kum 2026-2026 Academic Session Calendar tur sawiho in Elementary School bikah chuan 2026 - 2027 Academic Session tan hun atan March 23, 2026 (Monday) an ruat a, Sawrkar-in School Session hi January - December anga kalpui tura thutlukna a siam avangin Session thar School luh tan hun pawh hi tih hma hret a ngai ta a ni.

Mizoram-a loneituten Fertilizer duhkhawp lei tur an hmuh loh laiin Myanmar-ah thawn chhoh thin nia sawi chu thudik a nih thu Agriculture Minister PC. Vanlalruata chuan a sawi.

Land Revenue & Settlement Minister B. Lalchhanzova chuan LR&S Department-a Surveyor 14 lak tharte chu an hna a rinawm turin a chah.

Mizoram Baptist Kohhran-a thalai pawl, Mizoram Thalai Kristian Pawl (MTKP) Rorel vawi 72-na chu tunkar Ningani khan Lawngtlai Electric Veng-a BCM Biak In-ah neih a ni.

Tourism Minister Lalnghinglova Hmar chuan Mizoram-a Tourist Lodge hrang hrang te thawhchhuah aiin a thawkte hlawh atana senso zat a tam zawk avangin sawrkar chuan siam belh lovin an neih sa chu midang kut-a hlan a duh zawk tih a sawi.

AH&Vety Department changtu Minister C. Lalsawivunga'n African Swine Fever (ASF) avanga vawk thi vangin Mizoram sawrkar sum hloh zat chu cheng vbc. 960 a tling tih a sawi.

Chief Minister Lalduhoma'n tunhnaia Dan an siamthat Social Media-a sawi hlawh tak, The Mizo Marriage and Inheritance of Property (Amendment) Bill, 2026 chu sawrkar tih ni hran lovin pawl hrang hrang 10 aiawhte awmna Mizo Hnam Dan Review Committee rawtna an pulut mai niin a sawi.

Kumin April 1 atang khian Mizoram-ah ‘Special Intensive Revision (SIR), 2025’ chu kalpui a ni dawn a, hemi chungchang ah hian Chief Electoral Officer (CEO) Mizoram, Dr. Lalrozama chuan nimin khan a Pisa-ah Political Party hrang hrang aiawhte a kawm.

Mizo Hmeichhe Insuihkhawm Pawl (MHIP) General Hqrs. chuan February ni 23-a Mizoram Legislative Assembly-in a pass tak 'The Mizo Marriage and Inheritance of Property (Amendment) Bill 2026' chu Mizo hmeichhiate tan a him loh thu leh a that tawk loh thu nimin khan thuchhuah siama tarlangin, ennawn leh ngei nise an duh thu an tarlang a. Mizo Customary Law Committe-ah MHIP chu tel mah se Bill-ah erawh rawn leh hrilh an nih tak loh avanga an pawm loh thu an sawi bawk.

Nimin-a Mizoram Legislative Assembly thutkhawm ah Private Member Resolution sawihona hun hman niin Congress MLA C. Ngunlianchunga putluh, “Mizoten hmeichhia ti a kan koh thin na hi 'mi nu' ti a thlak ni rawh se” tih chu sawiho a nih hnuah hnawl a ni a. ZPM MLA H. Ginzalala putluh “ZPM Sawrkarin Mizoram tana a hnathawhte hi a lawmawm kan ti” tih chu sawiho a nih hnuah pawm a ni thung.

Mizoram Science, Technology & Innovation Council (MISTIC) bultumin India rampuma hman thin ‘National Science Day’ lawmna chu nimin khan Aizawl-a Dawrpui Multipurpose Hall-ah neih a ni a, Planning & Programme Implementation Department Secretary Lalmalsawma Pachuau chuan khuallian niin a hmanpui a ni. He hunah hian Mizoram Science Centre-a Curator Dr. Lalrinkimi chuan hmeichhiate’n Science lama hma an sawn dan leh Mizo hmeichhe hlawhtling te tarlangin, Chawhnu hunah Scientist, Professor leh Entrepreneur-te nen thupui hrang hrang hmangin thu sawina leh zirhona hun hman leh a ni bawk.

Mizoram Lok Sabha MP Richard Vanlal-hmangaiha chuan nimin khan North Eastern Electric Power Corporation (NEEPCO) Ltd. leh National Thermal Power Corporation (NTPC) Ltd. Chairman Gurdeep Singh chu a Office-ah lengin a kawm a, NEEPCO leh NTPC Chairman chuan Mizoram Sawrkarin a hun taka Power bill an pek tawh thin avangin lawmthu a lo sawi a, MP pawhin Sawrkarin a hun taka bill an pek avanga rebate cheng vbc. 7 chuang an dawn avangin lawmthu a sawi let bawk a. Tuirial Hydro Power Station tharchhuah hlep atanga CSR an hman thin chu Mizoram-ah ngei hman ni thei se tih sawiin, Mizoram chu State hnufual a nih avangin an CSR dangte pawh Mizoram-ah hmang thin turin a ngen bawk a. Chutianga hma a lo lak tur thu Gurdeep Singh chuan a sawi a ni.

Mizo thalaite tan Agnipath Scheme hnuaiah India Sipai (Agniveer) lak a ni leh dawn a, hemi atan hian Online hmanga inziahluhna hun hawn leh mek a ni.

Thla thar March 13, 2025 (Zirtawpni) khian Serchhip-ah Chapchar Kut hman a ni leh dawn a, hemi atana thil tul hrang hrangte nimin khan District Bawrhsap hovin sawiho a ni.

Presbyterian New Serchhip Kohhran Biak In-ah Siamthar lehna Camping neih-a lut te chu tukin hian an chhuak dawn ta a, zanin atang hian Kohhran Biak In-ah hian Follow-Up Programme hman chhunzawm nghal tura ruahman niin naktip Pathianni zan thleng khian Programme hman zui a ni dawn a ni. Tun tum Camping-ah hian mi 526 zet inziaklut an awm a ni.

Serchhip District Road Safety Committee chu nimin khan Serchhip DC Meeting Hall-ah Bawrhsap Paul L. Khuma kaihhruaia thukhawmin thla thar, March 2026 chhunga ‘Road Safety Month’ hman dan tur an sawiho a. Hemi hun chhung hian Lirthei document fel leh fello uluk lehzuala endikin, Police leh DTO Office in Special Drive an nei thin dawn a. Road Safety Awareness uar lehzuala kalpui tum niin School leh College-ah te, Gram Sabha-ah te inzirtirna neih a ni anga. Sawrkar Office leh zirna In zawng zawngah thutiam chhamrual a ni ang.

Mizoram Legislative Assembly thutkhawm neih mekah Finance changtu Chief Minister Lalduhoma chuan kum 2026-2027 chhunga Mizoram Budget cheng vbc. 17,469.92 chu nimin khan House-ah pharhin, hei hi kum 2025-2026 budget aiin cheng vbc. 2,271.16 in a tam zawk a ni.

Chief Minister Lalduhoma chuan mipui vantlang hnena hmasawnna thlentir an tum thu a sawi.

School Education Department changtu Minister Dr. Vanlalthlana’n Common Question Examination SAFES chuan by-heart system a tihreh theih tur thu a sawi.

State University Demand Committee Lung-lei chuan Mizoram State University (Amendment) Bill 2026 pass anih theihna atana hmalatute chungah lawmthu an sawi.

Empowering Mizoram Sports hnuaia Training/Coaching dil duh te’n Mobile Phone hmanga awlsam zawka dilna an thehluh theihna tura duan EMS website ‘ems.mizoram.gov.in’ chu nimin khan Sports & Youth Services Minister Lalnghinglova Hmar chuan a Pisa-ah tlangzarh.

Food Corporation of India (FCI) Mizoram State Consultative Chairman K. Vanlalvena’n Mizoram sawrkar in mipuite hnena buhfai a sem tur buhfai FCI ami vek ni thei se a tih thu a sawi.

Kum 2026-27 Mizoram Budget pharh takah Budget pumpui atangin hmasawnna hna thar thawhna tur, Capital Expenditure chu zaa 17.46 a ni a, sawrkar inrelbawlna senso Revenue Expenditure chu zaa 82.53 ni tura chhut a ni.

Mizoram State Election Commissioner Dr. H. Lalthangliana chuan, “SEC hian sawrkar leh political party ngaihdan-a kal hi a ba lo,” a ti.

Mizoram-a Kohhran Thalaite intawhkhawmna lian ber, Kristian Thalai Pawl (KTP) General Conference 2026 chu nizan khan Saitual-ah neih tan a ni a, Pathianni zan thleng khi a awh ang. KTP General Conference vawi 61-na neihna atan hian Saitual Public Playground-ah Pandal sak niin nizan hmasa khan Pandal hlanna hun hi hman a ni a, Organising Committee Chairman Rev. Thangchhuaka chuan Pathian hnenah a hlan a, Tawi Bialtu MLA Prof. Lalnilawma chuan Souvenir ‘Báwk’ tih chu tlangzarhin Palai hi mi 30,000 chuang awm tura beisei a ni.

Kumin January 21-a Chief Minister thuchhuah angin Aizawl khawpui Bypass-na tur Sihhmui atanga Muallungthu panna kawng laih mekin Tlawng lui a tibawlhhlawh nia sawi chutun thla ni 24 khan Aizawl Bawrhsap leh District Disaster Management Authority Chairman Er. Lalhriatpuia IAS hovin a hmunah enfiah a ni a. Muallungthu bula Tuisik lui leh Mauphir lui te chu nikum Fur lai khan kawnglaihna vung hian a chhilh nual tawh tih fin-fiah a ni a. Mauphir lui hian Tuisik lui finin chu chuan Tlawng lui a fin leh a. Hetiang a nih avang hian leivungin a chhilh chin tih hre turin ke-a luidung zawhin Mauphir luia leivung hian Tuisik lui a la thleng lo tih enfiah a ni a. Tuisik luia leivung pawh hian Km 2 chuangin Tlawng lui a la thlen loh bakah leivung emaw chhirh hnuhma hmuh a ni lo bawk. Hetiang hi tun dinhmun ni mah se Furpui lo thleng turin Tlawng luia leivung a lenthlak loh nan a danna tur ruahmanna tlangpui a hmunah sawiho a ni a. Ruahmanna kimchang zawk siam turin a tul anga Drone Survey neih te r...

Mizoram Cooperative Apex Bank Ltd. Board of Directors Meeting chu nimin khan Aizawl-ah MCAB Chairman Lalnunsanga kaihhruaiin neih a ni a, Mizoram chhunga Society PACS hrang hrang te Computerization 1st Phase atan PACS 24 te Computerized tawh niin tunah hian 2nd Phase kalpui mek a ni a, PACS 25 dang Computerized tura zawh tep a nih thu tarlan a ni. MCAB Board Meeting hian Loan dilna 97 pek a remti a, heng loan dilna hrang hrang te hi mimal leh pawl atangin Agriculture, Sumdawnna, Bana kaih (Handholding) leh Biak In sakna loan te an ni a, a vaiin cheng vbc. 27.30 a ni. Tun dinhmuna Apex Bank-a deposit hi cheng vbc. 1796 niin Loan pekchhuah hi cheng vbc. 1263 a ni a. Sum kawl atanga Loan pekchhuah tehfung CD Ratio chu zaa 70 a ni mek a. Apex Bank hian Branch 35 nei mekin tun Financial Year hian Zemabawk leh Saipum ah te Branch hawn belh tum a ni.

 

Serchhip District Bawrhsap Paul L. Khuma chuan nimin khan Leng khua ah East Lungdar Area MUP Conference chu khuallian niin a hmanpui.

Mizoram Indigenous Games Association (MIGA) Sub-Hqrs. Serchhip chuan nimin khan kum 2026-2027 chhunga hruaitu tur thlanna neiin President-ah R. Chalhmingliana (AOC Veng); Vice President-ah V. Lalrintluanga (Field Road); Secretary-ah Kaptluanga Ralte (Vengchung); Asst. Secretary-ah Biakremmawia (Vengchung); Treasurer-ah Malsawmdawngliana (Venglai) leh Fin. Secretary-ah R. Vanlalchhuanawmi (AOC Veng) te thlan an ni.

Planning & Programme Implementation Department changtu Chief Minister Lalduhoma chuan ZPM mi leh sa ni lo tan pawh CM Special Package dawn theih a nih thu Assembly House hrilhin, kum 2024 – 2025 chhungin tanpuina dawng Progress Partner 2,255 an awm thu a sawi bawk.

Horticulture Department changtu Minister C. Lalsawivunga’n Mizoram intodelhna hmanrua atan Sapthei chin beihpui thlak an tum thu a sawi.

Agriculture Department changtu Minister PC. Vanlalruata'n tun thla February ni 2 atangin sawrkarin Sawhthing lei tan tum mah se tun dinhmunah Secondary Collection Centre (SCC) 64 zinga 4 atang chauhin lei a la nih thu House a hrilh.

Mizoram Larsap General (Dr) Vijay Kumar Singh chuan Bairabi - Sairang Rel kawng hawn tak chuan hmasawnna a rawn thlen mek thu leh khualzin pawh nasa taka an pun phah thu a sawi.

Nimin-a Mizoram Legislative Assembly thutkhawmah ‘The Mizoram State University (Amendment) Bill, 2026’ chu sawiho a nih hnuah lungrual taka pawm a ni.

Mizo Hmeichhe Insuihkhawm Pawl (MHIP) General Headquarters chuan tun thla ni 11-a ‘Women Icon Award 2026’ dawngtu Health Minister Lalrinpuii lawmpuina hun an buatsaih.

Aizawl East leh Aizawl West District Civil Supplies Officer (DCSO) Office building sak thar tur lungphum chu nimin khan Supply Minister B. Lalchhanzova chuan MINECO-ah a phum.

Union Cabinet thukhawm chuan Kerala State hming chu 'Keralam' tia thlak a remti. Information and Broadcasting Minister Ashwini Vaishnaw chuan Kerala State hming thlakna hi Cabinet-in a pawmpui hnuah President chuan Kerala Legislative Assembly-ah Kerala (Alteration of Name) Bill, 2026 a thawn leh dawn tih a sawi a, Kerala Legislative Assembly ngaihdan lak a nih hnuah Sawrkar laipuiin hma a la zui anga, State hming thlakna tur Bill hi Parliament-ah pharh turin President rawtna lak a ni leh dawn thu a sawi bawk. Kerala Legislative Assembly chuan kum 2024, June 24 khan hming thlakna resolution hi an lo pawm tawh a ni.

Chief Minister Lalduhoma'n mipuite mamawh hriat theih nan MLA te chu an bial chhunga an ngaihpawimawh inthlahrung lovin a changtu Minister te leh ama hnenah thlen thin turin a chah. Nimin-a Assembly Session zawhna leh chhanna hunah House Leader Lalduhoma chuan Link Road mamawhna a sang hle tih sawiin, Horticulture leh Agriculture-ah Link Road laihna tur nuai 3000 ve ve ruahman a ni a, Oil Palm bik Link Road chu Prime Minister leh DoNER Minister ten an ngaihpawimawh em avangin an duh aia tam cheng nuai 3000 bawr vel an dah bawk tih a sawi a, Project thlan kawngah project thlansa hlui tawh tak atanga thlan a ngai fo tih sawiin, tun dinhmuna mamawh vak tawh lo te a tel theih avangin MLA te chu an Bial chhunga an ngaihpawimawh chu inthlahrung lova a changtu Minister te thlen thin turin a chah a, mipuiten mamawh ngaihven zui zel turin MLA te chu a chah a ni.

Rural Development & Administration Department changtu Minister Prof. Lalnilawma chuan VC te lawmman tihpun tumna chu rawtna kalpui mek a nih thu Assembly thutkhawm neih mekah MNF Member Prova Chakma zawhna ziaka chhangin a sawi a, “Council of Ministers Meeting Ni 17.11.2025-in zirchiang leh tura a rel angin Commissioner & Secretary, RD&AD kaihhruaina hnuaiah Study Team din tawh a ni,” a ti a. Tihpun tumna zat erawh Study Team te zirchian tura dah mek a nih avangin sawi mai theih a nih loh thu a sawi bawk.

Power & Electricity Department changtu Minister F. Rodingliana chuan ZPM Member VL. Zaithanzama zawhna chhangin Mizoram in kawlphetha leina man ba kan nei lo tih nimin khan Assembly House a hrilh a. Kawlphetha leina man pek that avangin rebate dawn kan neih thu pawh sawiin, December 2023 - March 2024 chhungin Rs. 6,09,433.94; April 2024 - March 2025 chhungin Rs. 2,23,97,143.86 leh April 2025 -January 2026-ah Rs. 4,76,04,084.51 a nih thu te sawiin, a vaiin Rs. 7,06,10,662.31 hmuh a nih thu a sawi a ni.

Agriculture Minister PC. Vanlalruata chuan kuthnathawktute tan PMFBY (Crop Insurance) Scheme kalpui turin hma an lak mek thu nimin a Assembly thutkhawm zawhna leh chhanna hunah a sawi a, Pradhan Mantri Fasal Yojana (PMFBY) Scheme hnuaia Committee sang ber State Level Coordination Committee on Crop Insurance chuan thlai panga hmangin District thlanchhuah ah te Crop Insurance kalpui turin notification a chhuah tawh thu a sawi a. Hemi ang hian Sawhthing chu District zawng zawngah; Buh chu Champhai, Kolasib leh Mamit District-ah; Mizo Hmarchate chu Serchhip, Saitual leh Hnahthial District-ah leh Zikhlum leh Bawkbawn chu Ser-chhip District-ah te kalpui a nih dawn thu a sawi a ni.

Aizawl Day 2026 chu nimin khan Aizawl Lammual-ah hman a ni a, Aizawl Mayor Lalrinenga Sailo chuan he hun hi a hmanpui a ni.

National Highways & Infrastructure Development Corporation Limited (NHIDCL) hnuaia KRAM Infracon Pvt. Ltd. ten Serchhip District chhunga kawng siamthat hna an thawh mek chu nimin khan Serchhipa thuthar thehdarhtu ten tlawhin he hna hi thla thar March thla chhunga zawhfel hman tum a nih thu thawktute chuan an sawi.

Serchhip Bawrhsap Paul L. Khuma chuan nimin khan Serchhip District-a Leng khua tlawhin Vibrant Villages Programme II (VVP II)-a khaw thlan Leng khuaa Village Action Plan a thun tur ngaihtuahin khawtlang hruaitute nen Leng VC House-ah an thukhawm.

Serchhip District-a Deputy Commissioner (DC) Office-ah Gazetted Post sanction 8 a awm. Nimin-a Assembly Inkhawm zawhna leh chhanna huna zawhna chhangin DP&AR Minister K. Sapdanga chuan Serchhip DC Office-ah Gazetted Post sanction 8 a awm thu a sawi a, heng te hi Deputy Commissioner, Addl. Deputy Commissioner, SDO (Sadar), Election Officer pakhat theuh leh Sub-Deputy Commissioner pathum bakah Superintendent pakhat te an ni. He huna tarlan a nih danin Gazetted Post sanction DC Office-a awm dan chu Aizawl-ah 19, Lunglei-ah 10, Champhai, Lawngtlai, Siaha leh Kolasib-ah 9 theuh, Mamit-ah 8 leh Saitual, Khawzawl leh Hnahthial-ah 7 theuh a ni.

National Disaster Response Force (NDRF) kaihhruaina hnuaiah nimin khan Govt. Serchhip College-ah Earthquake (lirnghing) Mock Drill neih niin lirnghing thlen thulha chhanchhuahna leh chhawmdawlna hna tawh dan tur a tak anga entir a ni.

Chief Minister Lalduhawma’n sawrkar kum kal mekah NABARD atangin cheng vbc. 199.26 leh SASCI Loan cheng vbc. 2345.08 an puk tawh thu a sawi.

Department of Personnel and Administrative Reforms (DP&AR) changtu Minister K. Sapdanga chuan Mizoram sawrkarin sawrkar hnathawk aikal la mi 37 a hrem tawh thu sawiin, mi 29 chu an hna atanga chawlhtir an nih thu a sawi.

Mizo Hmeichhia ten hnamdang an neih hnua an Mizo-na titawp a Tribal an nihna an fa ten an chhawm theihlohna tur, The Mizo Marriage and Inheritance of Property (Amendment) Bill, 2026 chu nimin khan Assembly chuan lungrual takin an pawm.

Nimin-a Assembly Session-ah Finance enkawltu Chief Minister Lalduhoma chuan, sawrkar kalta te leibâ an rulh mek thu sawiin, “Sawrkar leh turte leiba hnutchhiah lo turin theihtawp kan chhuah,” a ti a. Leader of Opposition Lalchhandama Ralte chuan sawrkar thar apianga leiba rulh a nihin, sawrkar kal tawhte leiba an ti ngai lo niin a sawi thung.

Mizoram-a a hmasa ber turin niminpiah khan Zoram Medical College and Hospital, Falkawn-ah Pancreas Cancer chu Verh (Laparoscopy) in zai a ni. Niminpiah khan ZMC&H-ah hian Ril leh Pum lam (Gastroenterology) zirhona leh Surgical Workshop neih a ni a, Gastroenterology zirhona ah hian Manipal Hospital, Salt Lake, Kolkata atanga lo kal Doctor tan Pancreas Cancer hi an khawih a. Medical Gastroenterologist (Gastro & Liver Clinic) Dr. Benjamine Khiangte nen tangho in Endoscopic Ultrasound (EUS) chu a mamawh damlo mi pariat tan a thlawn veka tihsak an ni bawk. EUS hi sawrkar Hospital-ah Mizoram-ah kalpui vawikhatna a ni a. ZMC&H Doctor-te chuan EUS khawl chu khawl tangkai tak a nih thu leh Mizoram pawna damlo thenkhat refer ngaih chhan a la nih avangin mipui tam zawk banphaka sawrkar Hospital-a neih ve theih hunah chuan harsatna tam tak a sutkian ngei an beisei thu an sawi a ni.

Lawngtlai District Bawrhsap Donny Lalruatsanga leh Lai Autonomous District Council (LADC)-a Chief Executive Member (CEM) C. Lalsawmzuala te chuan nimin khan Lawngtlai District hmasawnna tur kawng hrang hrang an sawidun.

Municipalites-ten ECI E-Roll hman ang Common E-Roll neih ve rawt a nih chungchang ah Mizoram State Election Commissioner chuan Mizoram chu India Danpui hnuaiah humhalh a nih avangin ramchhung hmun dang anga teh ve a rem lo tih a sawi.

Transport Department Minister Vanlalhlana chuan Taxi rate chungchangah State Transport Authority (STA) rate chuan zawm a hlawh loh avangin Phai lama an tih angin E-booking kalpui tum a nih thu nimin khan Assembly House-ah a sawi a, sawrkar kum kal mekah lirthei atanga chhiah tlingkhawm chu December 2025 thlengin Rs. 48,63,59,440 a nih thu a sawi bawk.

Mizoram Cooperative Apex Bank Ltd. Branch 35-na turin nimin khan MCAB Falkawn Branch chu MCAB Chairman Lalnunsanga chuan a hawng a, he hunah hian Falkawn VCP H. Zarmawia chuan Falkawn-ah Mizo Bank ngei hawn a ni chu lawmthu sawiin, theihtawp chhuaha mipuite pawhin Bank leh ATM te hmang tangkai tura tan an lo lak tur thu a sawi bawk.

Rural Development & Administration Department changtu Minister Prof. Lalnilawma chuan kum 2024-2025 chhunga Job Card holders te an Ni 100 inhlawhna man (wages) pek vek tawh an ni tih nimin khan Assembly House a hrilh a. Kum 2025-2026 Financial Year atan MGNREGA hnuaiah Ni 100 inhlawhna tur hi a awm theih beisei a nih thua sawi bawk.

Nimin-a Assembly Session-ah Tourism Minister Lalnghinglova Hmar putluh, 'The Mizo-ram (Registration of Tourist Trade) (Amendment) Bill, 2026' chu sawiho a nih hnuah pawm a ni. Tourism Minister Lalnghinglova Hmar chuan kum 2020 khan The Mizoram (Registration of Tourist Trade) Act neih a nih tawh thu sawiin, “He amendment-in a tum ber chu Tourism Department hnuaia awm ngai lo, lo awmta te dan hnuaia him zawka kan enkawl theihna tura dil belhna a ni ber,” a ti a. Department chan siamrem a nihin tunhmaa awm thin LAD chu Rural Development nen kaikawpin, Rural Development & Administration tih a nih tawh thu a sawi a, “Govt. of Mizo-ram Allocation of Business Rules, 2019 January 16, 2025-a tihchhuahah Tourism Department chanah Municipal páwn lama park, picnic spot leh intihhlimna hmun dangte belh a ni,” a ti a; Tourism chan ni ngai lo te Tourism Department chanah dahluh a nih thu a sawi.

DP&AR changtu Minister K. Sapdanga chuan Mizoram Subordinate Services Selection Board (MSSSB) tharthawh leh tumna a awm lo tih nimin a Assembly zawhna leh chhanna hunah sawiin, tun dinhmunah MPSC chuan Group B Non-Gazetted leh a chunglam recruitment a khawih a, Department chuan Group C leh Group D recruitment a khawih thung tih a sawi a, Nikum December thla atang khan Department ten hna an lak turah MPSC chuan exam zawhna a siam tawh thu pawh a sawi bawk.

Mizo Zaimi Inzawmkhawm General Hqrs-in inter college beat contest a buatsaihah finalist te a hriat theih ta a. He inelnaa tel - video thehluh te endik a nih hnu-ah finalist band 12 thlan chhuah an ni a. March ni 4 leh ni 5, 2026 ah Vanapa Hall, Aizawl-ah Grand Finale neih a ni dawn a ni.

Serchhip District huapa Ruihhlo ngai te puala Gospel Camping neih zawh a nih hnuah nizan atang khan Presbyterian New Serchhip Kohhran buatsaihin an Kohhran Biak In-ah Siamthar lehna Camping neih chhunzawm leh a ni a, tunkar Zirtawpni khian Campers te an chhuak leh ang. He Camping-ah hian Speaker atan Frederick Lalrindika (Bethel Ministry) hman niin nizan-a he thu buatsaih lai thleng hian Campers hi mi 530 vel an tling tawh tih a Kohhran Committee ten an sawi.

National Disaster Response Force (NDRF) kaihhruaiin Vawiin chawhnu hian Govt. Serchhip College-ah Lirnghing (earthquake) chungchang ah Mock Drill neih a ni dawn.

African Swine Fever (ASF) avanga mahni ranvulhlai suattu te hnena zangnadawmna pekchhuahna hun chu nimin khan Animal Husbandry & Veterinary (AH&Vety) Department Minister C. Lalsawivunga hovin a Pisa-ah hman niin Serchhip District-ah pawh zangnadawmna pechhuak turin chak taka hmalak nghal a ni.

Central Young Lai Association (CYLA) chuan Lai Autonomous District Council (LADC) leh Chakma Autonomous District Council (CADC) inrina lung an phunna chu a dik lo tiin BJP, Chakma Autonomous District Council (CADC) hruaitute chuan Larsap hnenah an thlen.

Chief Minister Lalduhoma'n sawrkarin Mizoram Bana Kaih (Handholding) Scheme, 2024 hnuaia loan hmu tura a thlan tawhte chu Bank in hnawl tura thuneihna a nei lo tih a sawi.

Mizoram Legislative Assembly thutkhawm ah Sialkal Range Development Council Bill, 2026 chu Select Committee-ah siamthat ngai te siamtha turin pass a ni.

Chief Minister Lalduhoma chuan ramchhung khawpui thenkhata Mizoram House-ah te Manipur a Zohnahthlak unaute thlen phalsak theih a nih thu nimin-a Assembly thutkhawm ah zawhna chhanga sawiin, Manipur khawpui pakhat Lamka ah Mizoram House sak tum a nih thu leh sum sanction erawh ala awm loh thu a sawi bawk.

GAD changtu Chief Minister Lalduhoma chuan Assam Rifles-in Aizawl-a an hmun an chhuahsan chhanah tu tan mah hming that lak tumna chiah a ngaih loh thu a sawi.

Nimin-a Mizoram Legislative Assembly thutkhawm ah Home Minister K. Sapdanga chuan December, 2025 chhung khan District khawpui hrang hrangah Traffic Police-ten 'No Tolerance Drive' an kalpui tih sawiin, “No Tolerance Drive kalpui a nih lai hian sawrkar leh Private Motor thliarhranna a awm lo. A hmun chawitir, Challan pangngai emaw, e-challan hmanga pawisa chawitir nghal an nih avangin Dan bawhchhiate sawrkar motor an nih leh nih loh chhinchhiah a ni lo,” a ti bawk.

Home Minister K. Sapdanga chuan Vairengte leh a chhehvel Kudam atanga Sawrkar chhinchhiah thlap tawh khawih chet tawh loh tura tih kuhva ro bag 9635 atanga bag 5741 bo chu hmuhchhuah ala ni lo tih Assembly Inkhawm-a Member pathum- Ramthanmawia, H. Lalzirliana leh R. Rohmingliana te zawhna intawm ziaka chhangin a sawi a. A ruchuaktu te man an nih hriat a nih loh thu sawiin, action lak a nih dan zawhna chu Kudam neitute lakah Criminal Complaint case 24 thehluh a ni tih a sawi bawk.

Home Minister K Sapdanga chuan February 5, 2026 thleng khan Mizoram-a Myanmar atanga rawn raltlante chhinchhiah hna chu 93.04% zawhfel a nih tawh thu nimin khan Assembly House a hrilh. ZPM Member VL. Zaithanzama zawhna chhangin Home Minister K. Sapdanga chuan Myanmar atanga rawn ralthlante chhinchhiah hna hi District tina Deputy Commissioner-te'n an thawh mek zel thu sawiin, “A rang thei ang bera zawh vat tum a ni,” a ti. Home Minister tarlan danin, Bangladesh atanga rawn raltlante chhinchhiah hna pawh a kal mek zel a, zawhfel vat tum niin February 5, 2026 thleng khan Mizoram-ah Manipur, Myanmar leh Bangaldesh atangin raltlan 38,059 an awm a ni.

Environment, Forest & Climate Change (EF&CC) Minister Lalthansanga chuan Rul chuk emaw, ramsa in a sehte chu ni thum (3) chhunga an hnai ber EFCC Department mi leh sate hnena in report tur a nih thu a sawi.

Art & Culture Department changtu Minister C. Lalsawivunga chuan Art & Culture Department hmalakna in tun kum hnih chhungin Mizoram-a la awm lo Festival/Kut neih belh kan nei lo a ni tih nimin-a Assembly Inkhawm ah H. Lalzirliana zawhna ziaka chhangin a tarlang a. Mizoram-Assam Border Cultural Festival hman chungchang ah Dr. K. Beichhua zawhna chhangin Home Minister K. Sapdanga chuan November 25, 2025 khan Assam-a Dholai, Cachar District-ah hman a nih thu leh hemi senso atan hian Kolasib DC hnenah cheng nuai thum pek a nih thu a sawi a. Border chungchanga Mizoram leh Assam Sawrkar hotute remruat dan leh a tul an tih dan a zirin chhunzawm a nih tur thu a sawi bawk.

Home Minister K. Sapdanga chuan Police Quarters, Police Station, Out-Post leh Beat Post te cheithat tum a nih thu a sawi. Nimin-a Assembly Inkhawm ah Member te zawhna hrang hrang chhangin Home Minister K. Sapdanga chuan ram puma Police hmunhmate chu a tha lo tih an hriat thu sawiin, “Police Headquarter atangin ram pumah Survey neih a ni a, a mamawh zualte kan hre tawh. Tunhnaiah Central atangin Police Modernisation atan pawisa kan dawng a, ram pumah tangkai taka hman dan tur kan ngaihtuah mek,” a ti. Police indaihlohna a nasat thu sawiin Home Minister chuan, “Tun dinhmunah post ruak Battalion li daih vel hnawhkhah loh a awm. State Fund atangin hnawhkhah mai theih a ni si lo,” tiin indaih lo mah se, a awm ang angte'n theihtawp chhuah zel an tum thu a sawi bawk.

Kolkata-a Mizo awmte chuan Kolkata atanga Mizoram-a ruang phurh haw ngaite senso chhawk nan sawrkarin Mizoram chhunga a hman mek, ruang phurhna senso a tumsak thin ang chu hman ve theih nise an duh thu a sawi.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Political Session neiin he hun thu sawitu MPCC General Secretary PC. Laltlansanga chuan tunhnaia Chief Minister in ‘Congress te hi mi beidawng awmkhawm an ni’ ti a sawi ah “CM hian thudik tak a sawi a, kan CM leh ZPM sawrkarah hian kan beidawng a ni,” a ti a. “Enchhin duha ZPM vote tu neutral tam tak te pawhin beisei phalo sawrkar tiin an beidawng mek,” a ti a. Congress mipuite chu Zoram siamtha turin an bei a la dawng lo tih pawh sawiin, “NGO, Kohhran hruaitute, sumdawng leh sawrkar hnathawk rinawm tak takte pawh an la beidawng lo,” a ti a, “Thil tisualtu, thamna dawngtu tan chuan Congress hi a hlauhawm zel ang,” a ti bawk.

MNF Party chuan nimin khan Aizawl Mizo Hnam Run-ah Chhung Inkhawm neiin he huna thu sawitu MNF Legal Board Vice Chairman Lalpianfela Chawngthu chuan Lengpui ram Indian Air Force (IAF) hnena hralh chungchangah Chief Minister leh ZPM sawrkar in thu diklo tam tak sawiin, Dan an pawisa lo hle niin a sawi a. “ZPM sawrkar chuan ram Danpui leh Mizoram Legislative Assembly-in a adopt, Right to Fair Compensation and Transparency in Land Acquisition, Rehabilitation and Resettlement Act, 2013 (RFCTLARR Act, 2013) chu nasa takin a bawhchhia a. He ram lakna kalpui danah hian eirukna lian tham a awm ngei a ni tih chiang takin a lang a. MNF chuan he thil thleng hi pawi kan ti hle a ni,” a ti a. “He ramah hian Land Scam lian tham tak, dan leh hrai pawisa miah lova kalpui a ni hi Mizoram tana zahthlak kan ti a. ZPM Sawrkar hian ‘Burma Sipai Sawrkar’ ang maiin dan an duh duh hunah an pawt kawi a ni. Tunhnuah hetiang hi thleng tawh suh se,” a ti bawk.

Mizoram State Planning Board (MSPB) Vice Chairman Dr. Kenneth Chawngliana chuan Kalphung thar mipui sawrkar chu Mizoram tan a thlamuanthlak tih a sawi. Nimin-a ZPM party Chhung Inkhawm neih ah State Planning Board Vice Chairman Dr. Kenneth Chawngliana chuan Lalduhoma kaihhruai sawrkar in kawng dik a zawh mek tih sawiin, “Tuna kan hmalakna chin chauh atanga chhut pawhin mipuiten sawrkar tha a nih zia an hre mek a. Kum hnih chhung hian eiru ve duh chu nise eiruk tur a tam tawh lutuk a, heti chung hian tumah hming hliau awm lova kan Minister-te kut a fai thiau mai hi an fakawm takzet a ni,” a ti a. “Kalphung thar mipui sawrkar hi Mizoram tan a thlamuanthlak a, opposition party-te hian sawrkar ve an duh a nih chuan mipui tan policy-te zuarin Chief Minister tur te pawh zuar ngam ve rawh se,” a ti bawk.

Kum 2025-2026 Academic Session chu kan hmang zo dawn hnai ta a, zirna In hrang hrang ten Promotion Exam nei chho mekin Zirna In tam zawk chu tun thla chhung bak hawn a ni dawn rih lo a, March thla chhung zawng hian ‘Kum tawp chawlh’ kan tih thin ang hun kha hman a ni dawn a. Thla khat vel lai naupang ten School chawlh an hman dawn avang hian nu leh pa te pawhin he hun awl nia lang hi kan tu leh fa ten tangkai tak leh hlawk taka an hman dan tur kan ngaihtuahpui a tul hle mai a. Kawng tha lo zawhna hun remchang atana an hman lohna tur atan leh thil tha zirchhuahna hun remchang atana an hman zawk theihna tur kan ngaihtuahpui a tulin a pawimawh hle a ni.

Chief Minister Lalduhoma chuan Serchhip-a Ruihhlo pual-a Gospel Camping buatsaiha lut, eizawnna mumal nei leh bultanna nei lo te chu sawrkar in a tanpui dawn tih a sawi.

Presbyterian Serchhip Pastor Bial leh Serchhip Vengchung Pastor Bial-a Kohhran Pavalai Pawl (KPP) te chuan nimin, Pathianni hmang khan Bial huap Intawhkhawmna an nei a, heng Intawhkhawmna Zirtawpni zan atang khan neih niin Report hrang hrang ngaihthlak a nih hnuah Inrinni khan intihhlimna hun te hmangin Inrinni zan atanga nizan thleng khan Speaker te hnen atangin thuchah an ngaithlak bawk a ni. Pastor Bial huap KPP Intawhkhawmna hi Serchhip Pastor Bial ten Serchhip Hmar Veng Kohhran Biak In-ah neiin Serchhip Vengchung Pastor Bial ten Serchhip Bazar Kohhran Biak In-ah an nei bawk a ni.

Tun thla February ni 9 atanga Presbyterian New Serchhip Kohhran Biak In-a Ruihhlo ngai te puala Gospel Camping buatsaih chu Feb. 20-a zawhfel a nih hnuah nizan thleng khan Follow-up Programme hman zui a ni a, chhimtu mipui an thahnemin Bialtu MLA leh Chief Minister, Lalduhoma pawhin nizan khan he Follow-up Programme hi a rawn hmanpui a ni. Ruahman lawk ang chuan Vawiin atanga tunkar Zirtawpni thleng khian a hmun ngai ah hian a duh apiangte tan Gospel Camping neih chhunzawm leh tur a ni ang.

Thenzawl khuaa mipa naupang pathum tui-a tlahlum te chu an ruang lumen a nih hnuah nimin khan vuiliam an ni.

Serchhip-a Land, Revenue & Settlement Department-a thawk Francis Lalruatfela chu lirthei chetsualna avanga hun engemaw chen hliam a tawrh hnuah Inrinni zan khan boralin nimin khan vuiliam a ni. Aizawl Tlangnuam atanga Serchhip-a hnathawhna avanga rawn awm Francis Lalruatfela (36) H/o Caroline Saidingpuii Sailo hi tun thla ni 14 khan a thianpa nen Scooter hmangin Serchhip atangin Aizawl an pan a, kawng lakah chesual palhin hliam na tak a tuar a, Thingsulthliah CHC panpui a nih hnuah Feb. 15 khan Ebenezer Hospital panpui a ni a, a Thluak-ah thi a tlin nasat avangin zai ngam a ni lo a, ICU-ah enkawl zui ni mah se Inrinni, February 21, 2026 zan dar 7:15 vel khan a boral zui ta a ni.

Mizoram Universal Health Care Scheme hnuaia Empanelled Hospital ni lova damlo te inenkawlna senso Rs. 27,45,81,659 chu pekchhuah a ni tawh a. February ni 3, 2026 thlenga sum bat la awm cheng vbc. 25 chuang pawh sawrkar kum kal mek chhungin pek tlak vek tum a ni bawk.

Adviser to CM (Technical)  Er. H. Ginzalal MLA chuan Inrinni khan Aizawl Peak Restaurant-ah NHIDCL hotute thutkhawm neihpuiin NH-306 Kolasib to Sairang an sawiho a. NHIDCL hotute chuan he kawng siam mek hi tun Thal chhung ngeia siam zawh a nih tur thu leh, Fûr a lo thlena harsatna lo awm palh thil thuah boulder leh rora chhekkhawl an tum thu an sawi bawk.

Forensic Science Laboratory (FSL) Mizoram-a mi thiamte chu kum 2000 atanga kumin (2026) January thla thlengin pawikhawihna hmun 1,815 ah kal tawhin, kum 2024-2025 chhung khan FSL mithiamte chuan tualthahna chungchang tum 20 an enfiah bawk a ni.

Mizo Language Development Board (MLDB) chuan India Constitution Eight Schedule-a Mizo tawng dah a ni theihna turin hma an la mek.

Central YMA General Secretary Prof. Malsawmliana chuan ruihhlo la ti lo te venghim turin Kohhran huangchhung leh chhungkua atanga inzirtir a tul thu a sawi.

Inrinni khan Aizawl-ah Inner Line Permit (ILP) enfiah runpui neih niin Aizawl-a hnamdang awm zingah ILP nei lo leh fello mi 68 zet hmuh an ni.

Adviser to CM (Implementation of Handholding Scheme) Dr. KC. Lalmalsawmzauva chuan ei leh bar a intodelhna turin leh kuthnathawktute thlai tharchhuah man man zawka tihral thin a nih theih nan Mizoram Sawrkar chuan Bana Kaih Scheme chu tangkai takin a hman mek thu a sawi.

ZPM Thalai President leh MLA Jeje Lalpekhua chuan National Highway-06 siamthat hna thawh mek chu an vil reng dawn tih a sawi.

Mizoram sawrkar-a Art & Culture Department chuan Ministry of Culture, Govt. of India atanga thu an dawn angin Inrinni zing khan Aizawl-ah a huhoa tlan leh thirsakawr khalhna hun, ‘Ekta Diwas Unity Run & Cycling’ an hmang. Sawrkar laipui chuan ramchhunga State leh Union Territory zawng zawngte chu Union Home Minister hmasa ber leh Iron Man of India tia hming an vuah Sardar Vallabhai Patel-a pian champha-phak kum 150-na hriatreng nan October ni 31, 2024 leh October ni 31, 2026 inkara hun hman dan tur hrang hrang a duang a. Hemi hnuaiah hian Ekta Diwas thupui ‘One India, Self-Reliant India’ tih hmangin Art & Culture Department chuan Unity Run & Cycling chu Mizoram Cycling Association leh Aizawl City Run Club te thawhpuiin a buatsaih a, he hunah hian mi 140 vel tlanin Cyclists mi 55 an tel bawk a ni.

Information & Public Relation Department buatsaih-a Kolkata khawpui hmun hrang hrangte fang turin Mizoram hmun hrang hranga MJA Member mi 9 leh anmahni hruaitu I&PR Department mi pahnih te chuan Inrinni khan Aizawl an chhuahsan a, I&PR Director K. Vanlalsangi chuan vailiamin tun thla ni 26-ah Aizawl an rawn thleng leh ang.

India leh Myanmar ramri-a venhimna hna thawktu Assam Rifles te chuan Zirtawpni khan Lawngtlai District-a Kakichhuah-ah Mobile Vehicle Check Post siamin Chhimtuipui lui (Kolodyne) kaltlanga Mizoram-a rawn luh tum Lawngleng te an endikna ah Methamphetamine nia hriat mum 80,000 manin a vaiin kg. 3.95 a rit a ni a, cheng vbc. 11.85 man a ni. Inrinni khan Champhai District Police leh Assam Rifles te chuan Zokhawthar-ah Methamphetamine kg. 15 leh gram 916-a rit an man leh bawk a ni.

Mizoram Legislative Assembly Budget Session neih mek chu ni thum chhung chawlh a nih hnuah Vawiin chawhma dar 10:30 hian chhunzawm a ni leh dawn a. Hun hmasa lam darkar khat chhung zawhna leh chhanna hun atan hmang lehin hemi hun hian Paper hrang hrang leh Report te House-ah pharh a ni anga, Sialkal Range Development Council Bill, 2026 leh The Mizoram Shops and Establishments (Regulation of Employment and Conditions of Service) (Amendment) Bill, 2026 te chu pharha sawiho zui nghal a ni ang.

Kum kalta 2025 chhung khan Tlabung-a Environment, Forest and Climate Change Department leh Bangladesh ramri-a duty BSF-te chuan Bangladesh-a tawlh tur ni ngeia hriat Teak tum 1,945 zet an man. Tlabung-a Environment, Forest and Climate Change Department chhinchhiah danin, kum kalta 2025 April thla atanga December thla thleng khan Bangladesh-a tawlh tur ni ngeia hriat Teak tum 1,945 man ni a, heng zinga Teak tum 1,150 chu ramri-a duty BSF sipaite man niin a dang 795 chu Forest Department-te man a ni thung. Dan lova tawlh Teak tum 1,945 man khawm sa, lilamna atanga sum hmuh chu Rs. 28,18,196 a tling a, Sawrkar sum bawmah heng Teak lilamna atanga sum hmuhte hi chhunluh a ni.

Nikum October 21-23, 2025 chhunga YMA Inkhawmpui Lian vawi 75-na Sakawrdai-a neih in ‘Zohnahthlak chi peng hrang hrang Mizoram a chengte zingah, chi bil hmalakna a awm tawh loh nan Central YMA in hma la rawh se’ an tih bawhzuina atan Central YMA chuan thuchhuah siamin, ‘Mizoram hi Zofate inlungrual tak leh inrem taka kan chenhona a nih avangin kan hnam in-lungrualna tichhe thei chibil zawnga hmalakna te, chibil hamthatna tur leh dawmkawnna tur zawnga hmalak bikna hrang hrangte hi sawrkar, Kohhran leh pawl hrang hrang ten ti lo turin kan in ngen,” an ti a. Mizote hi Hnam tlem te kan nih avangin Hnam pual bila thil tih hrang hrangte hian Mizo Hnam inpumkhatna a tichhe thei tih hriaa Hnam pumpui thatna tur chauha ngaihtuahna seng tlang turin an ngen bawk.

Nimin February 20, 2026 kha ‘Mizoram State Day’ niin he ni pual hian Mizoram hmun hrang hrangah Ram tana Tawngtaina ni, State Day of Prayer atan hman a ni a, Serchhip-ah pawh New Serchhip YMA Hall-ah he ni pual hian tawngtai rualna neih a ni.

Mizoram Upa Pawl (MUP) Serchhip South Area chuan nimin khan Conference vawi 9-na hmangin ram leh hnam tana tawngtai rualna an nei nghal bawk.

Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.

Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.

Mizoram Upa Pawl (MUP) General Hqrs. President Nghaklian-mawia chuan nimin khan Thenzawl Area MUP Conference vawi 24-na chu khuallian niin a hmanpui a, MUP member te chu mi vannei, Pathian malsawmna dawng an nih thu sawiin, Thenzawl chu sawrkar hmalakna hrang hrangah pawh an vannei hle nia a hriat thu a sawi. Tar Chawmna chungchang sawiin, a changtu Minister leh Social Welfare Department-a thawktute nen theihtawp chhuahin hmalak mek a nih thu a sawi bawk. PCI Thenzawl Field Veng Kohhran Hall-a Thenzawl Area MUP Conference hi an President, C. Hranglura chuan kaihruaiin an Member boral mi 36 te sunna hun an hmang a, an huamchhung ah hian Thenzawl, Buangpui, Neihloh, Zote South leh Kanghmun South atangin Branch 12 an awm a ni.

Tuikum Bialtu MLA leh Agriculture Minister PC. Vanlalruata chuan nimin khan a Bial chhunga Chhingchhip Community Hall-ah Chhingchhip Area MUP Conference Vawi 32-na chu khuallian niin a hmanpui a, sawrkarin Upate a ngaih pawimawh thu sawiin, Tar Pension tanpuina sawrkarin a tipung tih a sawi a, Tar Pension chungchanga an harsatna pawh sawrkarin a hriatpui thu leh hmalak zel a nih thu a sawi a. Nungchang mawi leh tha, pi leh pute atanga kan chhawm thin kha mahni tu leh fate hnenah hrilh tam turin a chah bawk. Chhingchhip Area MUP hian MUP Branch 7 huamin, Member 709 an awm a, he Conference-ah hian Lengkhawm zai-a Intihsiakna an neih bakah Member thi 33-te sunna hun an hmang bawk.

Mizoram Larsap General (Dr) Vijay Kumar Singh chuan nimin, February 2026-a Mizoram State Day pualin Mizoram leh ram chhung mipui zawng zawngte Chibai bukin, Mizoram leh India ram chak leh hmuingil din turin inhlan thar leh theuh turin mipuite a sawm bawk.

Food, Civil Supplies & Consumer Affairs Minister B. Lalchhanzova'n Buhfai Supply tura Tender chhang hniam ber pe lova LZ Juice hnena Supply pek a nih avangin Sawrkar-in sum hloh a neih hriat a nih loh thu niminpiah-a Assembly Session-ah zawhna ziaka a chhanna ah a tarlang a, kum 2024 April atanga March 2025 thleng khan Buhfai Supply tura thlan LZ Juice te chuan Buhfai Quintal nuai 2 an supply hman tih pawh a sawi bawk.

Mizoram sawrkar Flagship Programme, Bana Kaih Scheme kaltlanga kuthnathawktute Sawhthing lei leh hralh kalpui mekah sawrkarin sumdawngten kuthnathawktute Sawhthing an leisakna tur hniam ber a bituk chu chawhrualin Rs. 32.56 a ni mek.

Mizoram Legislative Assembly Budget Session-ah ‘The Mizoram (Prevention of Public Land Encroachment) Bill, 2026’ lungrual taka pass a ni.

Mizoram sawrkar Art & Culture Department in Inrinni tin-a Falkawn-a ‘Living Museum’ an buatsaih thin ah Indian National Trust for Art and Cultural Heritage (INTACH) Hqrs., New Delhi chuan  Documentary Film an siam a, he Documentary Film siamna atan hian Art & Culture Department chuan a bikin man neiin Show a lo buatsaih sak a, hemi atan hian INTACH partner Mime Media Private Limited an rawn kal a ni.

Agriculture & Farmers’ Welfare Minister PC. Vanlalruata chuan Lawngtlai District-a Liapha khuaah Oil Palm Mill bun thar tumin hma an la mek thu a sawi.

Thla thar March 8-a International Women’s Day lo thleng tur hman dan tur chu niminpiah khan Aijal Club-ah Social Welfare Minister Lalrinpuii hovin rel a ni a, kumin hian International Women’s Day hi Pathianni a nih avangin March 18-ah hman tura ruahman niin kumin-a Thupui, 'Pekin Lukhawng a Nei' tih chu a taka tihhlawhtlin a nih theihnan hmalak dan tur hrang hrangte sawiho a ni bawk.

Mizoram State Day 2026-ah ram hruaitu hrang hrang ten Mizoram mipuite duhsakna chibai an buk.

Food, Civil Supply & Consumer Affairs (FCS&CA) Minister B. Lalchhanzova chuan sawrkar laipui in Mizoram-a Ration Card Pawl-a awm thei zat tura a bituk chu hnawhkhah a nih tawh thu sawiin, Ration Card Sen-ah mi 60,000 thunluh leh turin ruahmanna siam a nih thu a sawi bawk.