Eight Schedule-a Mizo tawng dah turin hma la zel

Mizo Language Development Board (MLDB) chuan India Constitution Eight Schedule-a Mizo tawng dah a ni theihna turin hma an la mek.

February 21, 2026 kha ‘International Mother Language Day’ niin hemi ni denchhena MLDB te hmalakna tarlan ah Mizo Language Development Board hian India Constitution Eight Schedule-a Mizo tawng dah tumin Study Group a din a, tlawm-ngai pawl hrang hrang leh Mizo hnam peng hrang hrang thalai pawla an hruaitute pawh kawmin an inlungrual hle tih an sawi a. Sawrkar leh mipuiin an thlawp that bawk thu sawiin, hma an lak zel dawn thu leh beisei pawh an neih san viau thu an sawi a. Hemi atan hian hun engemaw chen atang khan hmalakna hi kalpui a lo ni tawh a ni.

MLDB Secretary R. Lalsangpuia chuan Eight Schedule-a Mizo tawng a awm chuan Mizo mipuite tana a thatna tur tam tak a awm thu a sawi a. Official language dinhmuna hlankai a nih chuan India rama exam hrang hrangah Mizo tawng a chhan theih a nih dawn thu sawiin, Indian Information Service Group B (Gazzetted) bikah pawh Eight Schedule-a tawng awm te chu an luh zat zat thu leh Mizo tawng a awm ve loh avangin lut an la tlem thu an sawi a. Sahitya Academy hnuaiah pawh Mizo tawng humhalh nan kumtin Eight Schedule hnuaia awm ten an dawn ang lawmman a awm ziah theih dawn thu te a sawi a, Mizoram sawrkarin kan tawng humhalh mai tawh loin sawrkar laipuiin a humhalh a ngaih tawh dawn thu an sawi a, tawng mai bakah Mizo Culture thlengin a humhalh hna chu sawrkar laipui kutah a innghat thui tawh dawn hle tih an sawi a ni.

Eight Schedule-a awm turin tun dinhmun ah Mizo tawng telin tawng chi hrang hrang 38 atan dilna thlen mek a ni a. Tehna hrang hrang atanga chhutin Mizo tawng chu Eight Schedule a dah beiseiawm pawl a nih theih thu MLDB hotute chuan an sawi a ni.