Ramsa in a seh te ni thum chhunga hriattir tur tih sawi

Environment, Forest & Climate Change (EF&CC) Minister Lalthansanga chuan Rul chuk emaw, ramsa in a sehte chu ni thum (3) chhunga an hnai ber EFCC Department mi leh sate hnena in report tur a nih thu a sawi.

Nimin-a Assembly Inkhawm zawhna leh chhanna hunah MNF Member Ramthanmawia zawhna chhangin EF&CC Minister Lalthansanga chuan kum 2025 chhungin Mizoram-ah Rul chuk avanga nunna chan pakhat an awm thu sawiin, “Zangnadawmna pek a la ni lo. Rul chuk emaw, ramsa in a sehte chu ni thum chhungin an hnaih ber EF&CC Department mi leh sa te hnenah in report tur a ni a, anih loh chuan zangnadawmna inpek a har thin,” a ti.

INC Member C. Ngunlianchunga zawhna pawh chhangin EF&CC Minister chuan Wildlife Sanctuary chhunga ramsate laka hliam tuar emaw, nunna chan te emaw chu danin zangnadawmna pek a remtih loh thu a sawi a, “Hei vang hian Wildlife Sanctuary pawh ven uluk a ni a, tlaivara ven thin a ni,” a ti a, miin luhruk an tum talh erawh chuan inven vek sen a nih loh thu leh vanduaina an tawhin an tan a pawi thu te pawh a sawi bawk.