Common question exam-in by-heart system a tihreh beisei a nih thu Minister in a sawi

School Education Department changtu Minister Dr. Vanlalthlana’n Common Question Examination SAFES chuan by-heart system a tihreh theih tur thu a sawi.

Assembly Session neih mekah South Tuipui Bialtu MLA Jeje Lalpekhlua zawhna ziaka chhangin School Education Department changtu Minister Dr. Vanlalthlana chuan State Council of Educational Research and Training (SCERT) in Common Question Examination, Standardized Assessment for Elementary (SAFES) kalpui turin a tum hrang hrangte a tarlang a, Common Question Examination, Standardized Assessment for Elementary (SAFES) chuan Classroom zirtirna, zirna leh exam dan kalphung a tih hmasawn theih tur thu sawiin, Mizoram chhunga Elementary School ten tehna inang khat tlang hmanga Exam te buatsaihin National Level Assessment Tool hmanga exam an buatsaih tur thu a sawi bawk a. SAFES kalpui tur hian zirlaite ah Competency Base Question an hmachhawn dawn thu sawiin, zirlaite chu an zirlai an thiam bel hle a ngai dawn tih a sawi a, hei hian by-heart system a ti reh theih tura an ngaih thu a sawi bawk a ni.

Hei bakah hian Education Minister chuan Jeje Lalpekhlua zawhna dang chhangin State Level Random Examination chu Sawrkar sikul 325 a pawl 3 leh pawl 6 naupangte tan February ni 21, 2025 khan buatsaih a nih thu sawiin, he Exam hi zirlai naupangte dinhmun zirchian nana buatsaih a nih thu a sawi a. MBSE chuan Nov. 25, 2025 khan High School 232-ah Class 9 tan Random Examination hi conduct-in he exam-ah hian Paper pakhat (mark 100 pu) awmin, Major Subject panga English, Mizo, Mathematics, Science leh Social Science atangin Question 20 theuh buatsaih a ni a. A question hi Multiple Choice Question (MCQ) niin naupang ten OMR hmangin an chhang tih a sawi.

Education Minister chuan zirna hmasawnna atana State Level Random Examination tangkaina tur pawh sawiin, “Question te hi Competency-based an nih avangin kan zirlai ten Subject bilah a ni emaw, Subject pakhatah pawh eng laiah hian nge harsatna an neih tih hriatna kawngah min pui dawn a, chu chu kan hriat chuan hma kan lak zel dan turah min pui dawn a ni,” tiin Central Level-a Assessment Exam hrang hrang, NAS/PARAKH Rashtrya Sarvekshan (PRS), JEE, NEET ang te kan naupang ten tun aia an hmachhawn thiam lehzual nan a puih beisei a nih thu a sawi a. Report Card chu kimchang taka buatsaih tura ruahman a nih thu pawh sawiin, “Hei hi a lo chhuah hunah kan zirlaite dinhmun – an chakna leh chak lohna te hriat theih beisei niin hei hian ram puma kan kal zel dan tur (policy) duan kawngah min pui dawn a ni,” a ti bawk.