Mizoram chu Digital State hmasa ber nih tir tum

Chief Minister Lalduhoma'n Mizoram chu India-a Digital State hmasa ber nih tir an tum tih a sawi.

Nimin-a Assembly thutkhawma zawhna leh chhannna hunah Member te zawhna kal zel chhan a nih hnuah House Leader Lalduhoma chuan ZPM kaihhruai sawrkar in Mizoram khaw thenkhata Mobile leh Internet Signal awm lo chu an ngaipawimawh hle tih a sawi a, BSNL nen thawkdunin theih angin an bawhzui mek a, an hmalak mekah a huam loh khaw 20 vel chauh a awm tawh tih sawiin, an zawhfel hunah chuan India ramah pakhatna an ni dawn tih a sawi a, Mizoram chu India-a Digital State hmasa ber nih tumin tan an la tih sawiin, Artificial Intelligence, AI lamah pawh tan an la tih a sawi a, Mizo tawng lehlinna pawh a tha tawh hle a, changtlung zawka tih tum a nih thu a sawi bawk a ni.

ICT Minister Dr. Vanlalthlana pawhin Artificial Intelligence (AI) lamah hma an la chho mek tih sawiin, Central sawrkar siam Bashini app-a Mizo tawng dah ve turin Bashini app chu MoU a ziahpui tawh tih a sawi a, he app hian hmun leh hmunah tawng 22 a let chhuak thei a, amah ngei pawhin a hmang tangkai hle tih a sawi a, he app-ah hian Mizo tawng dah ve turin AI hmang leh College leh University lama mithiamte nen tangkawpin chak takin hma an la mek a, nakum lamah chuan hman theih a nih a beisei thu a sawi a. Mizoram-ah AI Centre Excellence din turin hma an lak thu sawiin, “A tirah chuan Central-in 60% tuma State-in 40% tum turin ruahmanna an siam,” a ti bawk.

ICT Minister chuan Sawrkar laipuia Department of Telecommunications-in a chhinchhiah danin, tun dinhmunah Mizoram-ah Mobile/Internet Signal awm lohna khua 54 a awm mek a, chung zinga khaw 21 te chu mihring chen tawh lohna khua a nih thu sawiin, heng khaw 54 zingah hian BSNL ten 4G Saturation Project atangin khaw 14-ah Mobile Tower dah turin hma an la mek tih a sawi bawk.