Tourist Lodge te midang kut-a hlan duh zawk; Hnahsin Kut buatsaih zel tum a ni

Tourism Minister Lalnghinglova Hmar chuan Mizoram-a Tourist Lodge hrang hrang te thawhchhuah aiin a thawkte hlawh atana senso zat a tam zawk avangin sawrkar chuan siam belh lovin an neih sa chu midang kut-a hlan a duh zawk tih a sawi.

Nimin-a Assembly thutkhawm zawhna leh chhanna hunah Tourism Minister Lalnghinglova Hmar chuan Tourist Lodge leh khualzin kaihhnawih chawlhna (restaurant) a thawktute hlawh zat atan sawrkarin cheng nuai 44 vel bawr a sen laiin, Tourist Lodge leh khualzin kaihhnawih hmunhma atangin cheng nuai 25 vel a chauh a lakluh avangin sawrkar tan chuan sum lakluhna tur anga ngaih ni si in, phurrit a ni zawk tih a sawi a. Tourist Lodge thenkhat phei chu mikhual la thlen miah lohna te a awm avangin sawrkar chuan an neih sa zinga pawimawh zual te chei that a, din belh a tum rualin, siam belh aiin an neih sa te chu midang kuta hlan a duh zawk tih a sawi a. MADC huam chhunga Tourist Lodge hrang hrangte chu MADC enkawltir tura hma an lak thu pawh member te zawhna chhangin a sawi bawk.

Tourism Department tarlan danin, Mizoram a khualzin pung mekah Tourism Department chuan mipuite hnena zirtirna tur Community Based Tourism a kalpui mek a, hemi hnuaiah hian khualzin hip kawnga theihna nei tha khuate, khualzin ten an tlawh thin khuaah mipuite nena inkawmna buatsaih thin a ni a, heng hunah hian khaw mipuite hnena zirtirna lo pe chhawng theitu tur VC leh NGO-te bakah Tourism Industry-a eizawngte kohkhawm thin niin, Tourism hmanga an khawtlang leh an nitin eizawnna a puih theih dan turte, khualzin lo dawnsawn dan leh mikhualte chunga that chhuah pawimawhna te zirtir thin an ni. Hei bakah hian Tourist Service providers hrang hrang- Hotel, Homestay, Guesthouse, Restaurants, Cafe, Tour Operator, Tour Guide, Taxi Drivers, Local Council hruaitute te bakah Youtuber leh Influencers-te hnenah capacity building programme neihpui tur a ruahmanna siam a nih thu a tarlang a ni.

Tourism Minister chuan Chaltlang Tourist Lodge enkawl turin Hotel Apollo-te thlan an nih thu sawiin, “Anni nena hlan tur hian Law Department-in an pawm tawh a, Finance Department lamin siamthat duh an nei a, siamthat mek a ni. March hi chuan kan inhlan hman kan beisei. Hotel changkang tak din tum a ni,” a ti bawk.

Hnahsin Kut buatsaih zel tum a nih thu pawh sawiin Tourism Minister Lalnghinglova Hmar chuan, "A buatsaihtute sawrkarin a pui thin a, nikum pawh khan Bana Kaih Scheme leh Department dang cheng nuai 30 chuanga puih an ni. A buatsaihtute hian sawrkar nena tih ho tha an ti a, inbiaknate neih a ni,” tiin sawrkar chuan a puih chhoh zel dawn thu a sawi.