Jordan Centre inhlawn turin Synod ngaichang mek

Social Welfare Minister Lalrinpuii chuan Sethawn-a ruihhlo ngaite enkawlna Jordan Centre enkawlah Synod ngaihchan mek an nih thu sawiin, “Ruihhlo do kawngah sawrkar a tang nasa hle,” a ti.

Nimin-a Assembly thutkhawm zawhna leh chhanna hunah MNF Member pahnih Ramthanmawia leh K. Laldawngliana te zawhna intawm chhangin Social Welfare Minister Lalrinpuii chuan Synod hnena Jordan Centre hlan turin sawrkar chu a inpeihfel tawh tih a sawi a, “Synod lam kan ngaichang mek a ni. Tin, hemi atan hian Synod chuan Budget-ah cheng vbc. 2 a dah tawh niin thu kan dawng. SEC an thukhawm leh hnai a, chumi hunah chuan min rawn hrilh ang,” tiin Synod inpeih hunah hlanfel theih a nih tur thu a sawi bawk.

Lalrinpuii chuan Jordan Centre hlan tur hian Synod nena Agreement chu Law Department-ah endik tir tawh niin, Finance Department-ah endik leh mek a nih thu a sawi a, “Jordan Centre enkawl duh zawnna te kan chhuah a, chhangtu an awm lo. Synod kan bia a, anni'n enkawl rem an lo ti a, a lawmawm hle. Sawrkarin a hlan hunah Synod hnenah Grand-in-Aid kumtin cheng nuai 50 sawrkarin a pe thin dawn a, hei hi tihpun zel theih tura tih a ni,” a ti.

Synod hnena Jordan Centre hlan a nih chhan zawhna chhangin Social Welfare Minister chuan, “Kan ram economy kan hria a, chu bakah sawrkar hnathawh anga kan thawh chuan zep thu awm lo, tupawh hi kan thatchhe tlang a. Tih tak takna kan nei ngai lo. Kohhrante'n enkawl se a tha ber ang kan ti ta a ni,” tiin Synod-in lawm taka an lak sak tak thu a sawi a ni.