The Mizoram State University (Amendment) Bill, 2026 pawm

Nimin-a Mizoram Legislative Assembly thutkhawmah ‘The Mizoram State University (Amendment) Bill, 2026’ chu sawiho a nih hnuah lungrual taka pawm a ni.

He Bill puluttu Minister Dr. Vanlalthlana chuan nikum March ni 4-a Mizoram Assembly Legislative-in ‘The Mizoram State University Bill 2025’ a pass hnu khan Mizoram State University din chhoh a nih theih nan hmala nghalin, hnathawktu tur Post siam nghal a ni a, Post siam zinga a tul zualte lak nan Advertisement pawh chhuah nghal a ni tih sawiin, Mizoram State University Headquarter atan Aizawl Luangmual a Geology and Mining Department Office chu tihfel tura hmalak a nih laiin, Bill pass a nih hma leh hnuah Lunglei, Champhai, leh Mamit atangte in Representation dawn a nih avangin NGO leh Bialtu MLA te titi pui an nih hnuah November ni 17, 2025-a Council of Minister thukhawm chuan ngun taka a ngaihtuahin Mizoram State University Headquarters chu Lunglei a dah turin a rel tih a sawi a, nikum November ni 20 khan Chief Minister chuan Lunglei-ah Mizoram State University Headquarters dah a nih tur thu a puang ta tih a sawi bawk.

He Bill chungchangah hian enfiah tur tam tak a awm avangin Bill Drafting Committee din thar lehin, Act awmsa an ennawn a, Council of Minister phalna lak a nih hnuah Assembly Session-ah pharh a ni ta a. He bill kaihhnawiha an ngaihtuahnaa lian ber chu Regional imbalance a nih thu sawiin, Regional imbalance tihziaawm nan Lunglei-ah dah a nih thu leh Bill tharah hian Section pathumah tihdanglam a awm tih a sawi a ni.

He Bill hi Lunglei West Bialtu T. Lalhlimpuia, Lunglei South Bialtu Lalramliana, Lunglei North Bialtu V. Malsawmtluanga leh Lunglei East Bialtu Lalrinpuii te chuan an thlawp thu sawiin, Aizawl-ah zirna sang tha tak tak a awm tawh avangin leh kum 2011 chhiarpuiah Aizawl tih lohah Lunglei District-a mipui cheng zat an tam fal bawk avangin Lunglei a Mizoram State University dah tura Council of Minister in an rel chu lawmawm an tih thu an sawi a. Champhai North Bialtu H. Ginzalala leh Champhai South Bialtu Clement Lalhmingthanga leh East Tuipui Bialtu Ramthanmawia te chuan Mizoram State University chu Champhai-a dah tura an ngen chunga Lungleia Mizoram State University dah a ni tur chu an lawmpui rualin, a lehpekah chuan Champhai District tan Mizoram sawrkar tan thil ropui tak a tih sak ve tawh an beisei thu an sawi bawk a ni.

Leader of Opposition Lalchhandama Ralte chuan Lunglei in Amendment chauha Mizoram State University an nei tur chu an thlawp lova, Aizawl tana siam tawh Mizoram State University Bill chu sut-in Bill thar hlak siamsak turin an phut tih a sawi thung a. Member 20 chuangin an sawi hnuah he Bill hi House chuan a pawm a ni.