Eptu hruaitu in sawrkar dinglai zawhna a zawt

Mizoram Legislative Assembly-a MNF Member leh Opposition Leader Lalchhandama Ralte chuan Mizoram Civil Service Combined Exam 2025 result lo chhuak enthat ngaia awm chuan Mizoram sawrkar chu sawrkar tha leh chak a ni tak tak em tih zawhna a siam tir niin a sawi.

Mizoram Legislative Assembly thutkhawm tan ni-a Larsap thusawi chungchanga Motion of Thanks sawihona nimin-a neih ah Eptu hruaitu Lalchhandama Ralte chuan Larsap chu Mizoram sawrkar hrechiang ber te zinga mi a nih angin, Mizoram sawrkar chu hna thawk tha (efficient), mawhphurha la ngam (responsible & accountable) leh langtlang (transparent) tih a chhiar lai khan a thinlung takin a tui loh a rin thu a sawi a, Mizoram sawrkar efficient loh zia chu Zoram thalaiten an hriatchian a rin thu sawiin, Mizoram Civil Service Combined Exam result lo chhuak enthat ngaia awm chuan efficient sawrkar a ni em tih thalaite chhan atan a duh tih a sawi a, MPSC pawhin mipui rinna a hloh phah ang tih a hlauhthawn thu a sawi bawk a. ZPM sawrkarin thil tam takah sawrkar hmasa tih a nih thu leh an tih a nih loh thu sawia, an mawhphurhna a nih loh thu an sawi fo thin leh kum 2023 December thlaa mipuiin thuneihna an pek atanga mawhphurhna an kovah an phur tawh tih ngaihtuah ngai lova, midang bel ching sawrkar chu mawhphurhna la ngam sawrkar a ni em tih zawhna a zawt bawk.

Langtlang sawrkar tih chungchang pawh sawi zuiin Lalchhandama Ralte chuan, Cabinet Meeting thu zep tlat a, puang tha duh lova, tunhnaia sawi hlawh em em, Lengpui Airport ram hralh chungchanga RTI zawhna chhanna pe tha duh lova, a zawtute CIC-ah an zualko hnua CIC-in DC a koh hnuah pek tur chin hrilh a, thuneitu sang CIC inrawlh ngai chu langtlang sawrkar a ni ngai em tih zawhna a zawt bawk a. House Leader-in ZPM sawrkar tirha langtlang sawrkar an nih tur thu leh tumah an enhran loh tur thu a sawi chu Vawiin thlengin hmuh tur a awm lo tih sawiin, “Khawiah nge langtlang sawrkar chu a awm?” tih zawhna a zawt bawk.