Chief Minister in Vantlang hnena hmasawnna thlentir an tum thu House-ah a sawi

Chief Minister Lalduhoma chuan mipui vantlang hnena hmasawnna thlentir an tum thu a sawi.

Sawrkar kumthar atana Mizoram sawrkar Budget pharh paha nimin-a House-a thu a sawi ah Chief Minister Lalduhoma chuan, “Kan Sawrkar-in Office kan luah tirh atang khan kan State sum leh pai dinhmun dik tak tarlang thei Budget siam hi kan tum ber a ni a. Kum lo kal tura kan Budget hian State sum dinhmun siamthatna mai piah lamah, Service tihthat te, Infrastructure tihchak te, zirna tha, damdawi lama inenkawlna tha, huan lo ram lama eizawnna leh a dangte hmanga mipui vantlang hnena hmasawnna thlentir a tum a ni,” tiin “Heng bakah hian inkalpawhna kawngpui tha, Electric supply hnianghnar, eizawnna siamchhuahna leh mi harsa zawkte dinhmun chawikante pawh kan ngai pawimawh hle a ni,” a ti a. Sawrkar laipui vision, Viksit Bharat tih hlawhtlinna kawnga a tam thei ang bera tha thawh ve an duh thu sawiin, “Kum 2047-ah chuan India ram pumpui dehchhuah (GDP) atanga 1% chu kan State atanga lo thawhchhuah ve kan tum a, service sector leh thil thar siamna (innovation) lama hmasawnna chu kan hmathlir pawimawh tur niin kan hria,” a ti bawk.

Sawrkar sum leh pâite mumal leh tha taka enkawl an tum thu pawh Chief Minister chuan sawiin, “Hun engemaw chen kan lo kalpui tawh, Public Account hnuaia sum dah hi leiba a nih ve tho avangin tihhniam zel kan tum a. Kum 2025–26 chhung ringawt hian K-Deposit leh D-III atangin cheng vbc. 1467.56 kan release tawh a ni,” tiin cheng vbc. 1.94 chu lapsed deposit-a puan a nih thu a sawi a. “Heng hmangte hian State sawrkar leiba (liabilities) pung nasa tur pawh kan veng zel a. General Provident Fund leh Retirement Benefit dangte pawh hun rei tak chhung pending awm tawh lovin, hun reilote chhunga pek-chhuah zel a ni tawh a ni,” a ti bawk.

Committed liabilities tihhniamna tur leh GST lak tam theihna turin Study Team an din thu leh Study Team-te rawtna angin, Works Department thenkhata leiba tlingkhawm chu kum thum chhunga chinfel an tum thu pawh Chief Minister chuan sawiin, “Study Team-te rawtna angin, heng thil a lo reh chhoh theihna turin Inventory Management System tha tak duan tum a ni a, chumi hnuaiah chuan bungraw lei dan leh Reporting System mumal zawk siamin, Department zawng zawngin rualkhai leh langtlang taka an hman theih tur SOR leh DPR siam dan tha zawkte pawh kan ruahman mêk a ni,” a ti bawk.