Buhfai supply chungchang House-ah Minister in a sawi

Food, Civil Supplies & Consumer Affairs Minister B. Lalchhanzova'n Buhfai Supply tura Tender chhang hniam ber pe lova LZ Juice hnena Supply pek a nih avangin Sawrkar-in sum hloh a neih hriat a nih loh thu niminpiah-a Assembly Session-ah zawhna ziaka a chhanna ah a tarlang a, kum 2024 April atanga March 2025 thleng khan Buhfai Supply tura thlan LZ Juice te chuan Buhfai Quintal nuai 2 an supply hman tih pawh a sawi bawk.

Supply Minister chuan September, 2025 thlenga buhfai supply-tu te chu a chhang hniam ber an ni lo tih pawh sawiin, “A chhan chu a chhang hniam ber khan a hun laia Supplier (MAMCO Ltd.) ten an hlawhchhamna rate bawka a rawn chhan avangin SPAB khan a hniam ber dawttu, LZ Juice a recommend a, pek a ni ta a ni,” a ti a. “October, 2025 atanga Supplier-te hi Sawrkar hnuaia Corporation an ni a, a chhang hniam ber te an ni,” a ti bawk.

Kum 2025 April atanga March 2026 Buhfai Supplier te zawhna pawh Supply Minister chuan chhangin, kum 2025 April atanga September 2025 thleng LZ Juice leh MIFCO Ltd. te an nih thu leh October 2025 atanga March 2026 Supplier-te chu MIZOFED Ltd., MIFCO Ltd., MAMCO Ltd. leh ZIDCO Ltd. te an nih thu a sawi a. Heng te hi Open Tender hmanga thlan an nih loh thu pawh sawiin, An supply-na rate chungchanga zawhna chu “2025 April atanga September 2025 thleng hi quintal khat Rs.3,550/- a ni a, October 2025 atang hian quintal khat Rs. 3,590/- a ni,” a ti bawk.

Tripura atanga Natural Gas Pipeline phum mek chungchanga zawhna pawh Supply Minister chuan chhangin, hemi atan hian sawrkar laipui in cheng vbc. 9,265 a ruahman atangin cheng vbc. 491 chu Tripura (Panisagar) to Aizawl atan ruahman hran a nih thu a sawi a. Khawpui chhunga sem-darhna tur Pipe phum hna tan ala nih loh thu leh Company in hmun an la neih fel loh th a sawi bawk.