Serchhip-ah Earthquake Mock Drill neih a ni

National Disaster Response Force (NDRF) kaihhruaina hnuaiah nimin khan Govt. Serchhip College-ah Earthquake (lirnghing) Mock Drill neih niin lirnghing thlen thulha chhanchhuahna leh chhawmdawlna hna tawh dan tur a tak anga entir a ni.
He Mock Drill hi chawhnu dar 2:00 atanga tan niin Staging Area atan Serchhip DC Pisapui hman a ni a, Govt. Serchhip College-a Administrative building chu lirnghingin a sawichhia anga lemchan niin zirlai naupang te zingah hliam tuar te first aid pek an ni a; hliam na tak tuar te chu Ambulance hmangin District Hospital-ah phurh an ni a. NDRF te hian College tualzawl-ah Puan In kaihin Makeshift Hospital an siam a. District Hospital atangin Medical mithiam ten an buaipui a ni. Hei bakah hian PHE Department a thawktu ten tui pipe chhia an siam a, Power & Electricity Department ten electric hruipui chhia an siam a. Fire Department ten Fire Tender thawhchhuah puiin kang an thelh bawk a ni.

He Mock Drill-ah hian NDRF, Police, Fire & Emergency Services, BSF, Aapda Mitra, PHE, P&E, Health Department leh Govt. Serchhip College zirlai leh zirtirtute an tel a ni.