ZPM chauh Sawhthing lei sak tum nia sawi enfiah tum

Nimin-a Mizoram Legislative Assembly thutkhawm zawhna leh chhanna hunah East Tuipui Bialtu MLA Ramthanmawia chuan a Bial chhung khaw pathumah ZPM chauh sawrkarin a leisak dawn nia sawi a awm tih sawiin, Chief Minister Lalduhoma chuan bawhzui a nih tur thu House a hrilh.

Nimin-a Assembly thutkhawm ah hian East Tuipui Bialtu MLA Ramthanmawia chuan a Bial chhung khaw pathumah Sawhthing chingtute chu Society-a inziahluh mai ni lo, ZPM-ah membership Fee pe tur tih an ni thu sawiin, “Membership Fee pek chauh ni lo a, lawmluh ni-ah an din loh chuan sawrkarin Sawhthing a lei sak dawn lo tih a awm. A ziak pawh ka nei,” a ti a. Hemi chungchang hi Sawrkarin a hriatpui leh pui loh zawtin East Tuipui Bialtu MLA chuan, “A serious ka ti. Hei hi maw mipui sawrkar chu, sawrkar thianghlim, felfai leh langtlang turin kan lo beisei a ni. Mi in an kut hnathawh an tharchhuah a ni a, a sem a sem a ni lo,” a ti a, NLUP leh SEDP chu a sema sem a nih thu a sawi bawk.

East Tuipui Bialtu MLA thusawi chung-changah hian Chief Minister Lalduhoma chuan a copy pe tura a duhthu sawiin, “A tak a nih chuan action kan la ang. A dik lo a nih pawhin kan umzui ang,” a ti bawk.

Agriculture Minister PC. Vanlalruata chuan hemi chungchanga East Tuipui Bialtu MLA, Ramthanmawia thusawi chu sawrkarin a hriatpui loh thu sawiin, “Nikum-a Sawhthing ching tam ber ber chu Congress leh MNF an ni a, a chhan chu an dinhmun a that vang a ni,” a ti a, a chi man a to avangin dinhmun tha lo tan Sawhthing a chin hnem theih loh thu a sawi a. Hei bakah hian Chief Minister Lalduhoma sawi thin chu ‘a phurtu ni lovin, a phurhna em kan en dawn’ tih a nih thu sawiin, “Hei hi tun thlengin kan la kalpui a ni,” a ti bawk.