Rate san vangin sawrkar leh Private Hospital an la inrem lo; inbiakna kalpui mek a ni

Health Minister Lalrinpuii'n Mizoram-a Private Damdawi In zinga Mizoram Universal Health Care Scheme (MUHCS) zawm lo te chu an rate a san em avangin sawrkarin inremna a la siampui ngam lova, inbiakna a kalpui mek tih a sawi.

Nimin-a Assembly thutkhawma zawhna leh chhanna hunah Member te zawhna leh zawh belhna te chhangin Health Minister Lalrinpuii chuan Mizoram-a Private Damdawi In lian te MUHCS hman tir an duh hle a, hetihlai hian an rate a san em avangin Mizoram sawrkar chuan inremna a la siampui ngam lo tih a sawi a, Mizoram pawna MUHCS Empanelled Private Hospital te rate chu a tlawm zawk hle tih a sawi. Minister chuan Mizoram-a Private damdawi In lianah te chuan Emergency leh thih leh dam inkar ah chuan luh theih a nih thu sawiin, phai lam damdawi In-a in tirh aiin an claim size a lian zawk tih a sawi a, hetihrual hian MUHCS-ah Mizoram-a Private Hospital Empanelled loh awm te chu inbiakna an kalpui mek thu leh Private Hospital-te hian package rate siam mekin, an indawr leh tur thu a sawi a. Tun dinhmunah Mizoram chhunga Private Hospital 16 leh Day Care Centre 3 te bakah Mizoram pawna Private Hospital 33 te chu MUHCS Empanelled Hospital an nih thu a tarlang bawk.

Health Minister Lalrinpuii chuan kumin February ni 3 thlenga Empanelled Hospital a damlo refer mi 2,837 te Bill Rs. 25,11,52,017 chu Mizoram Sawrkarin a bat sak tih sawiin, MUHCS atana US Dollar maktaduai 108 puk tur chu Sawrkarin Corpus Fund atana dah turin thutlukna a siam avangin MUHCS inziahluhna fee tihhniam tumna a awm lo tih a sawi a, MUHCS inziahluh theih hun chu engtik lai pawha inziahluh theih tura hawn reng a ni dawn lova, BPL Card nei lo mi rethei chhungkuate tan Sawrkar-in MUHCS a inziahluh man tih hniam tumna a awm lo tih a sawi bawk.

Heng bakah hian Health Minister chuan MUHCS atana pawisa thawhkhawm (contribution) in Bill tur a daih loh thu sawiin, “Budget-a kan dahte nen erawh a daih dawn. ADB loan kan dawn hun chuan a pung ringawt pawh a thlamuanthlak dawn. MUHCS kan kalpui danah hian hlauhthawn awm lutuk a awm lo,” tiin MLA-te chu an Bial-a mi harsa zawkte MUHCS-a inziahluh man tum sak turin a ngen bawk.