Sawhthing man bituk chawhrual kg ah Rs. 32.56 ni mek

Mizoram sawrkar Flagship Programme, Bana Kaih Scheme kaltlanga kuthnathawktute Sawhthing lei leh hralh kalpui mekah sawrkarin sumdawngten kuthnathawktute Sawhthing an leisakna tur hniam ber a bituk chu chawhrualin Rs. 32.56 a ni mek.

Sawrkar in kumin-a Sawhthing lei kalpui mekah Handholding chungchanga Adviser to Chief Minister leh Mizoram Agriculture Marketing Board (MAMB) Co-Chairman Dr. KC. Lalmalsawmzauva chuan kuthnathawktute kut-a kg khata cheng 50 luhtir chu sawrkar thupui a nih thu a sawi a, Bana Kaih Scheme kaltlanga ‘Sawhthing lei leh hralh’ tihin a tum ber chu kut hnathawktu Mizoram mipui zaa 60 vel bawrten leirem an lo rah ve theih nan sawrkar chu sumdawngte leh Sawhthing chingtute suihzawmtu, Facilitator a nih thu a sawi a; nikum khan February ni 20-ah an kalpui tan a, kuminah chuan Februaru ni 2-ah kalpui niin Sawrkar chuan an lo sawi tawh angin kut hnathawktute kuta Rs. 50 a luh dan tur chu an thupui a nih thu a sawi a, engpawh lo thleng se sawrkar chu a inbuatsaih tih a sawi bawk.

Sumdawngte leh Sawhthing chingtute inkara sawrkar a inrawlh chhan sawiin Dr. KC. Lalmalsawmzauva chuan, tunhma zawng khan Sawhthing chingtute chu vai sumdawngten an duh zat rate-in an leisak thin a, kuthnathawktute an tangrual thei si lo a, chuvangin sawrkarin Support Price nen an thlavang a hauhsak a lo ngai ta a ni, a ti a; kuthnathawktute Society-a an awm tirna chhan chu Sawhthing man thu hla leh thil dangah an tanrual theihna tur a nih thu a sawi a. Society chu kuthnathawktute tan a nih thu leh sumdawngte leh kuthnathawktu Society-te chu a tam thei ang ber indawr se tih chu sawrkar duh dan leh hmathlir a nih thu a sawi bawk a; sawrkar chuan target a siam a, nikum khan a bul tanna a nih avangin a pulunga Sawhthing lei a ni a, kumin ah a sawngbawlna din uar niin, nakum lamah uar zawka a chin dan tha inzirtirna kalpui leh tum a nih thu a sawi bawk.