Serchhip-a SASCI hnuaia hmalakna dinhmun thlirho

Nimin khan Serchhip-ah District Bawrhsap Paul L. Khuma hovin Special Assistance to States for Capital Investment (SASCI) Scheme hnuaia Serchhip khawpui chhunga hnathawh mek chungchang leh an dinhmun te thlirho a ni.
He thutkhawm Serchhip DC Meeting Hall-a neih ah hian Ser-chhip khawpui chhunga SASCI hnuaia hnathawh hrang hrang dinhmun tarlan niin SASCI Scheme hnuaiah hian Serchhip khawpui chhungah Circuit House, sawrkar Quarters eh District Jail-a Quarters sak hna te thawh mek a ni a. He hunah hian PWD-a SDO (Building) Lalrindika chuan heng hnathawh hrang hrangte dinhmun chu a lem nen entirin a sawifiah a. Tun dinhmunah heng hmalakna hrang hrang te hi tha tawka ngaih a nih thu leh Contractor ten beisei aia chaka hna an thawh thu a tarlang a ni.

Heng bakah hian NEC sum hmanga Kawlri tlang-a Heritage Society Building sak mek dinhmun pawh ngaihthlak a ni a. He building hi Bawrhsap Paul L. Khuma bakah DoNER Secretary te pawhin a hmunah an lo endik tawh a. Hna tha taka thawh mek zel a nih thu tarlan a ni. He thutkhawm ah hian Contractors te hian an hmalak meknaa harsatna an tawh thenkhat te pawh sawi langin a chinfel dan tur sawiho a ni bawk. Nimin-a thutkhawm ah hian Contractor te, District thuneitute leh a viltu PWD hotute an tel a ni.