Bana Kaih Scheme chu tangkai taka hman mek a nih thu Adviser to CM in a sawi

Adviser to CM (Implementation of Handholding Scheme) Dr. KC. Lalmalsawmzauva chuan ei leh bar a intodelhna turin leh kuthnathawktute thlai tharchhuah man man zawka tihral thin a nih theih nan Mizoram Sawrkar chuan Bana Kaih Scheme chu tangkai takin a hman mek thu a sawi.

Ministry of Food Processing Industries, Govt. of India hnuaia FINER bultumin 'Regional Interaction Meet of Food Processing Industry' chu Inrinni khan Aizawl-a I&PR Auditorium-ah neih niin he hun hi khuallian nia a hmanpuina ah Dr. KC. Lalmalsawmzauva chuan ei leh bar a intodelhna turin leh kuthna-thawktute thlai tharchhuah man man zawka tihral thin a nih theih nan Mizoram Sawrkar chuan Bana Kaih Scheme chu tangkai takin a hman mek thu a sawi a. Phase I-ah kuthnathawktuten Bana Kaih Scheme hnuaia thlai thlanchhuah bik, Sawhthing, Aieng, Hmarchate leh Hmunphiah tharchhuah kawngah hmasawnna hmuh a nih thu tarlangin, Phase 2-ah thlai tharchhuahte tha taka sawngbawl hna, 'Processing' ah tan lak chhoh zel tum a nih thu a sawi a ni.

Adviser to Chief Minister chuan Mizoram-a kuthnathawktute chu Bana Kaih Scheme hmangin thuamchak mek an nih thu leh an thlai tharchhuahte vawnthat nan leh him dam taka thawnchhuah nan he huna thupui 'Packaging' chu thil pawimawh leh tangkai tak a nih thu a sawi a. Eitur leh bungrua tuamna te chuan a chhung ami a vawnthat mai bakah customer-te hipna pawimawh tak a nih thu sawiin, a leitu tur ten an hriattur pawimawh tak tak tarlanna a nih bawk tih a sawi a. Entrepreneur kalkhawm te chu 'Processing' an kalpuina kawngah a packaging an uluk ang bawkin a chhunga eitur (Product) awmte pawh a hriselin a thianghlim hle tur a nih thu a sawi a. Insumdawntawnna chu rinawmna a innghat a nih avangin sumdawng hlawhtling ni tur chuan taimakna leh rinawmna vawng nung tlat turin kalkhawmte a chah bawk.

Adviser to CM Dr. KC. Lalmalsawmzauva chuan Bana Kaih Scheme Phase I kalpui chhung khan Progress Partner 392 hnenah Loan pek a nih thu leh Progress Partner 2713 hnenah CM Special Package sem chhuah a nih bawk thu a sawi a. Phase 2 kalpui mekah Progress Partner 917 te thlanchhuah an nih leh tawh thu sawiin, Progress Partner tha leh rintlak thlanchhuah hna hi kalpui chhunzawm zel a nih thu a sawi bawk.

Regional Interaction Meet hi Agriculture and Food Processing Committee, FINER-a Member Francis Sailo chuan kaihruaiin Amitabh Ray, Chief Manager, FINER chuan MOFTI hnathawh dan a sawifiah a. He hunah hian mithiam hrang hrang ten Packaging chungchanga hriattur pawimawh hrang hrang te chu a lem nen an sawifiah bawk a ni.