Serchhip District-a NH-02 siamthat mek a hmunah thuthar thehdarhtu ten an tlawh

National Highways & Infrastructure Development Corporation Limited (NHIDCL) hnuaia KRAM Infracon Pvt. Ltd. ten Serchhip District chhunga kawng siamthat hna an thawh mek chu nimin khan Serchhipa thuthar thehdarhtu ten tlawhin he hna hi thla thar March thla chhunga zawhfel hman tum a nih thu thawktute chuan an sawi.

Serchhip District paltlangtu National Highway-02 laihzauh leh siamthat hna hi NHIDCL hnuaiah KRAM Infracon Pvt. Ltd. hian thawkin tunlai hian siamthat hna an thawk mek a, nimin khan MJA Serchhip District Member te chuan Serchhip leh Keitum inkar leh Serchhip by-pass Road te chu tlawhin KRAM Infracon Pvt. Ltd. atangin PRO Lalhruaitluanga leh Site Engineer, Dibyendu Mukherjji ten lo dawngsawngin an hnathawh dan tlangpui te lo hrilhfiah a. Serchhip leh Keitum inkar ah hian leimin nasatna hmun nasa zual pahnih a awm thu sawiin, heng te hi Furpui lo thleng leh turah pawh min leh mai thei dinhmuna a din dan te an sawi a. Serchhip by-pass Road-ah hian leiminna hmun pathum vel a awm thu pawh sawiin, hei bakah hian kawng chhuat bal siamthat hna an siam mek te pawh an thlirho a ni.

Nikum December 6 khan Serchhip Bawrhsap Paul L. Khuma chuan NHIDCL hnuaia Contractor te chu a Pisa-ah ko in an kut-a la awm kawng te siamthat hna thawh dan tur hi a sawipui a, hetah hian Baktawng leh Serchhip inkar kawngpui chu Krismas hma ngeia zo hman tura hrilhin, By-pass kawng chhe nasa tak, repair hna an khawih mek pawh January 2026 ralhma ngeia an zawh hman tur thu Contractor te chuan an sawi a. Hemi hnu kumin January 9 khan Bawrhsap hian Contractor te chu ko lehin thutkhawm hmasaa Krismas hmaa siam zo tura bituk an siam zawh loh chhan sawifiah tir an ni a. Contractor te hian an bungraw lakna hmunpuiah harsatna an tawh avang leh khawl chhia avanga zo thei lo an nih thu an sawi a. Hemi tum hian ruahmanna thar siamin February ni 12, 2026 ralhmain Baktawng atanga Keitum thleng kawngpui thawmthat hman nise an ti a. February 28-ah By-Pass Road pawh siamtha hman turin ruahmanna an siam leh bawk a ni.

Nimin-a MJA Member ten kawngpui an tlawhna ah hian Company-a thawktute chuan Baktawng leh Serchhip inkar leh Serchhip leh Keitum inkar kawngpui siamthat hna chu an zofel tawh tih sawiin, tunah hian Serchhip by-pass Road siamthat hna hi an tan leh mek tih an sawi a, tunah hian ni thum (3) vel hna an thawh tawh thu sawiin, Kikawn atangin chhimlam pana hna an thawh thu leh chawhrualin ni khat-ah km chanve vel thawk theia an inngaih thu an sawi a. He kawng hi KM 11.8-a thui a nih thu leh siamthat ngai hi KM 5 vel ni tura an ngaih thu pawh sawiin, tluang taka an thawh chuan March, 2026 chhunga thawh zawh an inbeisei thu an sawi a ni.

Kawng siamtute hian Serchhip District a NH-02 an enkawl hi KM 60-a thui a nih thu sawiin, March 2024 khan zawhfel a nih tawh thu leh an zawh atanga kum li (4) chhung enkawl zui tura tih an nih angin March 2028 thleng an enkawl zui dawn thu an sawi a. Tuna an harsatna ber chu Bungtlang-a Hot Mix plant an neih-a khawl chhe thin a nih thu sawiin, part thlakna tur hi Mizoram a lei tur awm mai thin lo chuan hnathawh a ti sawt lo thin niin an sawi a, Road Signange leh Parapet thir hmanga siam bo thin chu buaithlak an tih thu sawiin, khawl hmanga hnathawk an nih avangin Diesel an mamawh tam thu leh an duh ang lak mai tur awm lo thin chu an harsatna a nih thu an sawi bawk.

KRAM Infracon Pvt. Ltd. chuan an huamchhungah Compensate avanga harsatna te chinfel thawkhat a ni tawh tih sawiin, Chhiah-tlang-a kawng laih te pawh Blacktop thui tum a nih thu an sawi a. Sailiamkawn-a compensate la lo pakhat pawh inremna an nei tawh nia an hriat thu sawiin, buaipui mek a nih thu an sawi bawk a ni.