MZP in Aizawl-ah ILP nei lo leh fello manchhuak

Inrinni khan Aizawl-ah Inner Line Permit (ILP) enfiah runpui neih niin Aizawl-a hnamdang awm zingah ILP nei lo leh fello mi 68 zet hmuh an ni.

Mizo Zirlai Pawl (MZP), College SU leh Hnampual zirlai pawl hruaitute chuan Inrinni zing khan Aizawl khawpui chhung Kulikawn, Dawrpui (Bazar), Vaivakawn leh Bawngkawn-ah te hnamdang (vai) dan lo a rawn lut enfiah runpui neiin ILP nei lo leh ILP fel lo mi 68 zet an hmuchhuak a, heng mite hi thuneitute kutah an hlan nghal a ni a. ILP enfiahna hna an kalpui chhunga Traffic Police duty te thlawpna ah lawmthu an sawi. MZP hruaitute chuan, Dan lo-a hnamdang (vai) dapchhuahna ah hian kum reilote chhungin thil inthlak danglam tam tak a awm thu an sawi a, vai hnathawk tura kal a tam zawk hi Assam Registration lirthei khalhin, License neilo a khalh tam tak an awm a, Aizawl leh a chhehvela lirthei khalh an tam ta lutuk pawh an vei thu an sawi a ni.

Heng bakah hian ILP-a Mizoram-a an rawn luh chhan inziak (Purpose of Stay) nen a inmil lo lutuk a hnathawk awmte pawh tam tak man an nih thu sawiin, vai leh vai in-sponsor mi 7 man an ni bawk. Vai leh vai in sponsor awm hi MZP chuan mak an tih thu sawiin, hemi chungchang ah hian sawrkar thuneitute pawh hma la nghal tur leh ILP pekchhuah kawngah a ti diklotu an awm anih chuan chhuichhuaha hremna pek ngei an phut thu an sawi a. Sairang thlenga Rel a lo luh tak avangin Mizo mipuite pawh harh thar a, mahni awmhmun theuh ah ILP check uar tur leh an chhawr te ngei pawh an fel fai em tih ennawn fo turin Mizo mipuite an ngen bawk a ni.