Common E-Roll chungchang sawihona neih a ni

Municipalites-ten ECI E-Roll hman ang Common E-Roll neih ve rawt a nih chungchang ah Mizoram State Election Commissioner chuan Mizoram chu India Danpui hnuaiah humhalh a nih avangin ramchhung hmun dang anga teh ve a rem lo tih a sawi.

Chief Election Commissioner of India hova Electon Commission of India leh State Election Commissioner-te ni khat awh Round Table Conference nimin-a New Delhi-a an neih ah Mizoram State Election Commissioner Dr. H. Lalthlangliana chuan Mizoram chu Tribal Area '6th Schedule of the Constituton' leh Article 371G hnuaia Tribal Administratve Institution-in a humhalh tlat avangin ramchhung hmun dang anga teh ve a rem lo a ni, a ti a; He Conference-a thu khel ber Municipalites zawng zawng ten ECI E-Roll hman ang Common E-Roll neih ve rawt chungchang ah Mizoram SEC chuan Article 243 ZA-in State sawrkar chu Municipality te inthlan dan siam tura thuneihna a pek anga Dan siam theihna power nei an ni a, Election Commission chu dan siamtu ni lovin dan anga inthlan huaihawttu anih avangin Legislator-te thuneihna an chuhpui a thiang lo tih a sawi bawk.

ECI Round Table Conference-ah hian Mizoram atangin State Election Commissioner Dr. H. Lalthlangliana bakah SEC Secretary VL. Remliana, Chief Electoral Officer (CEO) Dr. Lalrozama leh Joint Chief Electoral Officer Ethel Rothangpuii te an tel a ni.