AR chhuah thu ah hmingthat lak tumna chi ah ngai lo

GAD changtu Chief Minister Lalduhoma chuan Assam Rifles-in Aizawl-a an hmun an chhuahsan chhanah tu tan mah hming that lak tumna chiah a ngaih loh thu a sawi.

Nimin-a Assembly thutkhawm ah MNF Member Robert Romawia Royte-in kum 2019-a Union Home Ministry-in Assam Rifle-te Aizawl atanga Zokhawsang-a insawn tura a tihna bak Order emaw, Memorandum dang a awm leh awm loh zawhna chhangin Chief Minister chuan, “A taka thil thleng leh a sawi a sawi chu a awm hrang. 'Kelsa kanna bel nen lam an chhuak' tih te a awm kha. Kum 2019 lehkha khan awmzia a nei lo, an chhuak chuang lo. A hretu chu Mizo mipuite an ni. Tumahin hming that lo lak tumna chiah ka ngai lo. Pathian a zahawm,” a ti a. Kum 2024-a State Day of Prayer an hman tumin Assam Rifle-te'n “Kan lam hawiin horn rawn dah suh u, in bengchheng lutuk,” an rawn tih thu sawiin, “Ring taka Pathian auh kan duh laiin, kan hnual rawh mai a ni. Kan tawngtai rual ta tawp a, 'Lalpa helai rem hi min pe rawh, nangmah fakna hmun atan min pe rawh' kan ti a, kan tawngtai chhanna a nimai. Lammual hi kumtin Pathian fakna atan hman a ni tawh,” tiin tute mahin ‘In tih, Kan tih’ tihna chiah a ngaih loh thu a sawi.

AR ram chhuansan turah Union Home Minister hnenah lehkha a ziah awm a hriat loh thu sawiin Chief Minister chuan, “A lehkha zawngin kan kal lo. Vawi khat Meeting kan koa, AR lam an thu a, kan inhnial a, kan tanhmun lam kan sawi mawi ve ve. Meeting koh fo chi a ni lo, hma kan sawn dawn lo tih rilruah a awm. Chuvangin, Prime Minister, Defence Minister leh Home Minister leh tawngkain kan sawi. Army Chief-in min rawn hmu a, kan sawi dun a ni. Lehkha ziak tel loin, thingpui leh chaw eihona atangin tihfel a ni,” tiin inremna an ziah tumin hriatpuituah eptu MLA-te pawh an tel thu a sawi bawk.

AR chhuahsan rama Laldenga Auditorium sak tura Union HM-in lungphum a phum vek tawh thlen chin zawhna chhangin Chief Minister chuan, “AR chhuahsan ram hman dan tur hi keimahni maia rel tha kan ti lo. Political party zawng zawng aiawh, NGO aiawhte telin vawi tam Meeting kan nei a, MNF aiawhte telvena Meeting ngeiah Laldenga Auditorium tih hi chu kan peih a, kan pawm tlang. Covention lian deuh, parking facility-te neiin siam ila kan ti a ni. Member zingah Laldenga Auditorium awm lo tura rawtna ziakin kan dawng a, a document pawh a la awm,” a ti a. “Vanapa Hall awm sa hi thiah a, thil tangkai danga hman rawtna a awm. Convention Centre sak tur hi Vanapa Hall put tir tura rawtna ngaihdan a awm, Vanapa hming daih lohna atan. Hei hi pawm a ni. Hall lianpui hnai deuhah function a ruala awm chuan traffic a jam nasa dawn lutuk tih ngaihdan a awm a ni,” a ti bawk.