Serchhip DC in Leng khua tlawhin VVP II hmanga hmasawnna hna thawh dan tur a hmunah a en
VVP II-a khaw thlan Leng khuaa Village Action Plan siampui tur hian Bawrhsap bakah Line Department ten Leng khua hi tlawhin VC leh tlawmngai pawl hruaitute nen an thukhawm a, Department leh Village Council te chuan khaw chhung hmasawnna tura ruahmanna thehlut tawhin heng te hi Bawrhsap leh a Team te hian a hmunah an enpui a, Leng khaw hmasawnna tura mamawh dangte an sawipui nghal bawk a ni. An rawtna thehluh zingah hian Community Hall sak te, Leng to Zuva inkar kawng siam te, Tui dahkhawlna tur Tanky lian siam te, Sub-Centre leh School cheithat te leh thildangte a tel a. Heng an rawtna hrang hrangte hi District Committee chuan a enzui leh dawn a ni.
Ramri khuate hmasawnna tur sawrkar laipui hmalakna Vibrant Village Programme (VVP)-I hi kum 2023 khan India-China ramri ah bultan a ni a. India-Myanmar leh India-Bangladesh ramri khuate huam turin Vibrant Village Programme II hi kum 2024 atang khan kalpui tan leh niin Mizoram-a RD Block 16 atangin thingtlang khaw 109-te chu Ministry of Home Affairs-in a thlang a. Serchhip District-ah chuan Serchhip RD Block hnuaiah Keitum khua bakah East Lungdar RD Block hnuaiah North Mualcheng, Lungkawlh, Bawktlang, North Vanlaiphai, Leng leh Sailulak khua te a huam a ni.
He hmalakna hi Central Sector Scheme a nih angin funding hi sawrkar laipuiin 100% a tum dawn a. Sawrkar laipui scheme kalpui mek sa te nen a theih chin chinah (converge) tur niin Convergence a rem lo a nih chuan MHA Level ah endik leh tur a ni.
VVP-II hian tum bulpui pali a nei a, chungte chu - a Fur a Thal-a lirthei tlan theihna (all-weather road connectivity) te, inbiakpawhna tha (telecommunication) te, Television leh Electric connection (on-grid connectivity) te a ni a. Ruhrel awmsa tihchangtlun bakah an mamawh pek belh an nih theih nan Village Action Plan (VAP) huam zau thei ang bera duan tur a ni a, heng a tum bulpui palite hi ngaih pawimawh tur a ni. VAP hi thla 3 chhunga siam zawh tur a ni a. Scheme awmsa suihfin (convergence) ngaih pawimawh tur niin heng khuaa cheng ten a huhoa hmasawnna an neih theihna tur ruhrel din a ni ang. VVP-II atan hian Bawrhsap kaihhruaina hnuaiah District Level Committee on Vibrant Village Programme-Il din a ni a. District Level Committee hi Chief Secretary kaihhruainaa din State Level Screening Committee for Vibrant Village Programme-Il in a khai leh a ni.
Comments
Post a Comment
I ngaihdan i sawi hian mipui ngaihdan i tarlang a ni!