Pawl 10 aiawh te awmna rawtna an pulut tih sawi

Chief Minister Lalduhoma'n tunhnaia Dan an siamthat Social Media-a sawi hlawh tak, The Mizo Marriage and Inheritance of Property (Amendment) Bill, 2026 chu sawrkar tih ni hran lovin pawl hrang hrang 10 aiawhte awmna Mizo Hnam Dan Review Committee rawtna an pulut mai niin a sawi.

Nimin-a Assembly thutkhawm ah Chief Minister chuan Thawhlehni-a an pass tak ‘The Mizo Marriage and Inheritance of Property (Amendment) Bill, 2026’ chu sawrkar tih ni hran lovin, Central YMA, MUP, MHIP, Council of Churches in Mizoram, Mizoram Kohhran Hruaitute Committee, Mizoram Women's Commission, Mizoram Law College, Mizoram Bar Association aiawhte bakah MZU mithiamte leh Official te telna Mizo Hnam Dan Review Committee rawtna an pulut mai a nih thu a sawi a. Mizo hmeichhia in hnamdang pasal a neihin a Mizona a chan tih chu a diklohna em em a awm lo tih sawiin, “A Mizona a chan avangin a fate pawhin Tribal nihna an nei thei tawh lo a ni,” a ti a, Mizo hmeichhiaten hnamdang pasal an neihin Tribal an ni zui zel ang em tih chu Mizo hnam dan chuan sawi chiah lo mahse a hnawl nia sawiin, hemi chungchang hi ngaihtuah zui zel tul a tih thu leh ngaihtuahtu tur Committee awm thei se a that a rin thu House a hrilh a ni. 

Chief Minister chuan tunlaiah Global Village-ah mihring te an chen tawh avangin hnamdang nena inneih pawlhna a thleng chho zel dawn tih pawh sawiin, tuma dan theih a ni lo tih a sawi a, Mizote pawhin thliarkar rilru an put loh a ngai ve tawh tih sawiin, amah ngei pawhin Mizoram pawn leh India pawnah te Mizonu hnamdang pasal nei an awmna hmuna Mizo awm ve ten an thlamuanpui, mi fel tak tak a hriat teuh thu a sawi bawk.