Sports Minister-in EMS Online Application a tlangzarh

Empowering Mizoram Sports hnuaia Training/Coaching dil duh te’n Mobile Phone hmanga awlsam zawka dilna an thehluh theihna tura duan EMS website ‘ems.mizoram.gov.in’ chu nimin khan Sports & Youth Services Minister Lalnghinglova Hmar chuan a Pisa-ah tlangzarh.

Nimin-a ‘ems.mizoram.gov.in’ tlangzarh hunah hian Sports Minister Lalnghinglova Hmar chuan Empowering Mizoram Sports (EMS) chu Mizo thalaite’n infiamna lama hma kan sawn theihna tur leh kum 2036-a India-in Olympic Games a thlen tura Mizo thalai tam lehzual an lan theihna tura sawrkar hmalakna pawimawh tak a nih thu a sawi a, Mizoram pum tuamchhuak Sports Coaching leh talent haichhuahna liantham kalpui tum a nih thu sawiin, hmun kilkhawr zawka naupang kum 8 – 15 inkar talent nei tha tak tak, training mumal dawng si lote chu zawnchhuah a, an bana kaih a, Mizoram leh India aiawh thei tura chherchhuah tum an nih thu a sawi bawk.

EMS hi January 14, 2025 khan Chief Minister Lalduhoma’n a tlangzarh a, a taka kalpui turin hmalak chhunzawm nghal niin December 1, 2025 khan Home Minister K. Sapdanga hovin Ramhlun Indoor Stadium-ah Kick-off hun a hmang a. December, 2025 vek khan ‘Trainers Training’ buatsaih niin JICA India nen tangkawpin Hawla Indoor Stadium-ah ‘Coach Development Programme’ buatsaih a ni bawk a. Nippon Sports Science University, Tokyo atangin Sports Coaching-a mi thiam bik, Professor Masumitsu Ito leh a thuihhruaite’n Mizo Coach 40-te zirtirna an pe a ni. Mi tam lehzualin an hlawkpui theihna turin Online-a coach dil theihna EMS website chu nimin khan hawn a lo ni leh ta a ni. 

EMS kalpuina tur hi 'The Mizoram Bana Kaih (Hand holding) Scheme' hnuaia 'Participative Planning and Innovations for Sustainable Development' component atangin cheng nuai 250 sanction tawh a ni a. EMS hnuaiah hian Mizoram hmun hrang hrangah naupang kum 8 - 15 inkarte chu Basic Coaching pek an ni dawn a, Coaching hi ni 15 chhung atan niin nitin darkar 3, a vaiin darkar 45 pek an ni dawn a. Archery, Badminton, Boxing, Hockey, Judo, Taekwondo, Weightlifting leh Wrestling te chu ngaih pawimawh tur a ni ang.

Coach duh khua/veng te'n EMS website kaltlangin online in dilna an thehlut ang a, a remchan dan ang zelin, tumah duhsak bik awm lovin Coach-te tirh chhuah thìn an ni dawn a. Coach diltu khawtlangin Coach-te veivahna (sumo fare), thlenna leh Coaching an pek chhunga an ei leh in an tum ve anga. Hei hi khawtlangin neitu rilru an put a, theihtawp an lo chhuah ve theih nana ruahman a ni a. EMS website https:/ems.mizoram.gov.in ah lutin, ‘Training Dilna Form’ tih hnuaiah mahni khua/veng, District hming leh RD Block chhutluh tur a ni.